గ్రంథాలయం
ప్రొఫైల్
ପୁରାଣ କଥା
ପୁରାଣ କଥା
ସୃଷ୍ଟି ର ସର୍ଜନା ସ୍ରଷ୍ଟା ଉତ୍ପତିଲେ
ନିର୍ମାଣିଲେ ବିଶ୍ଵକର୍ମା
ବ୍ରହ୍ମା ଜାତ କଲେ ସାଧୁ ପୁତ୍ର ଗଣ
ବେଦ ଅମୃତ ମହିମା ।
ସବୁ ଗୁଢ ତତ୍ତ୍ଵ ଧର୍ମ ମହାମନ୍ତ୍ର
ବର୍ଣ୍ଣିତ ଯେଉଁ ଭିଆଣ
ସେଇ ସେ ପବିତ୍ର ଗ୍ରନ୍ଥ ଲିପି ଅଟେ
ହିନ୍ଦୁ ଧର୍ମ ରେ ପୁରାଣ ।
ଓଁଙ୍କାର ରୁ ଭାସେ ପ୍ରଭୁ ନିରାକାର
ପରଂବ୍ରହ୍ମ ନିରଞ୍ଜନ
ସୃଷ୍ଟିର ଅନାଦି ଆଦ୍ୟ କାଳୁ ଏକ
ଧର୍ମ ଅଟେ ସନାତନ ।
କେଉଁଠୁ ଆରମ୍ଭ କେଉଁଠି ବା ଅନ୍ତ
ନହୁଏ କଳନା ମତି
ଏକ ପରଂବ୍ରହ୍ମ ଦ୍ୱିତୀୟ ନାସ୍ତିର
ବେଦ କରଇ ଉତ୍ପତ୍ତି ।
ଅଠର ଖଣ୍ଡର ପୁରାଣ ରହିଛି
ସବୁ ତତ୍ତ୍ଵ ଅଛି ଭରି
ପବିତ୍ର ପୁରାଣ ଶ୍ରବଣ ହୋଇଲେ
ପିଣ୍ଡ ପ୍ରାଣ ଯାଏ ତରି ।
ଆକାଶ ପର୍ବତ ଅନଳ ପ୍ରଳୟ
ପୂଜା ଉପାସନା ବ୍ରତ
ପଞ୍ଚଭୂତ ଅଟେ ଆମ ଏ ଶରୀର
ମାନବ ଜନ୍ମ ମହତ୍ତ୍ଵ ।
ଆଦିକବି ଶୁଦ୍ର ମୁନି ଯେ ସାରଳା
ଦାସ ପ୍ରଥମ ସାଧକ
ଝଙ୍କଡ଼ ବାସିନୀ କୃପା ଆଶୀର୍ବାଦ
ଲଭି ଅରଜିଲେ ଟେକ ।
ପରାଶର ମୁନି ବ୍ରହ୍ମାଙ୍କ ନନ୍ଦନ
ଲେଖିଲେ ବିଷ୍ଣୁ ପୁରାଣ
ଦେବ ଅନୁକମ୍ପା ଦେବଙ୍କ ମହିମା
ଅମୃତ ଭକତି ଜ୍ଞାନ ।
ମାତା ସରସ୍ୱତୀ ଆଦି ଜ୍ଞାନଦାତ୍ରୀ
କରୁଣା କରିବେ ଯେବେ
ଝରିବ ଝଙ୍କାର ସୁଧା ଜ୍ଞାନ ଧାର
ପାଣ୍ଡିତ୍ୟ ଲଭିବ ତେବେ ।
ରାଜା ପରୀକ୍ଷିତ ଶୁଣି ଭାଗବତ
ଭୂଲିଥିଲେ ଭୟ କ୍ଲେଶ
ପୁରାଣ ଶ୍ରବଣେ ପୁରାଣ ପଠନେ
ଆତ୍ମା କୁ ମିଳେ ସନ୍ତୋଷ ।
ଆର୍ଯ୍ୟ ସଭ୍ୟତା ରୁ ହୁଏ ଅଧ୍ୟୟନ
ପବିତ୍ର ପୁରାଣ ପାଠ
ଧର୍ମ ପୀଠସ୍ତଳି ମନ୍ଦିର ପ୍ରାଙ୍ଗଣେ
ଆୟୋଜିତ ନିତି ମଠ ।
ଜ୍ଞାନ ଭକ୍ତି ମୋକ୍ଷ ମାର୍ଗ ସଂଯମତା
ଦେଇଥାଏ ଏ ପୁରାଣ
ଅମୃତ ରସକୁ ଶ୍ରବଣ କରିଲେ
ପବିତ୍ର ହୁଅଇ ପ୍ରାଣ ।
ଭାରତୀୟ ଆମେ ସଂସ୍କୃତି ଆମର
ସଂସ୍କାର ର ମୂଳ ମନ୍ତ୍ର
ପୁରାଣ ଟି ଆମ ଅମୂଲ୍ୟ ମହତ୍ତ୍ଵ
ଶ୍ଳୋକ ଶାନ୍ତି ଦୀପ୍ତି ଶାସ୍ତ୍ର ।
ପୁରାଣ ଶ୍ରବଣେ ପାତକ ନାଶନ
ବୈକୁଣ୍ଠ ଲଭଇ ଜୀବ
ଅକାଳ ମରଣ ନ ଆସଇ ତାକୁ
ଖଣ୍ଡନ ହୁଏ ପ୍ରମାଦ ।
ଶୌଚ ଶାନ୍ତି ମନେ ଯେ କରେ ପଠନ
ପ୍ରଭୁ ରସାମୃତ ପାନ
ଧନ୍ୟ ସେଇ ଜନ ସଦା ପ୍ରଭୁଙ୍କର
ଲଭେ ଆତ୍ମାରେ ଦର୍ଶନ ।
