କ୍ଷତାକ୍ତ ପ୍ରେମ
କ୍ଷତାକ୍ତ ପ୍ରେମ
ଜଳି ସାରିବଣି ହୋମ ନିଆଁ ଜାଣେ
ଲିଭି ସାରିବଣି ବାସର ବତୀ
କାକର ହେବଣି କୁଆଁରୀ ଜୀବନ
ବରଫ ହେବଣି ସାଇତା ରାତି.... I
କଥା ଦେଇଥିଲ ମଥାକୁ ଛୁଇଁ ଯା'
ବୋହୂ ଚୋରି ସେଇ ଖେଳ ଘରେ
କେମିତି ପାରିଲ ବଧୂବେଶ ହୋଇ
ନାଲି ପାଟ ଶାଢୀ ଓଢ଼ଣାରେ....I
ହେଲେ ମୁଁ ଜଳୁଛି ଦକ୍ଷିଣ ବାଆରେ
ଫଗୁଣ ଆଡ଼େଇ ଦେହକୁ ଫୁଙ୍କି
ନିତି ଜଳି ଲିଭିବ କ୍ଷତାକ୍ତ ପ୍ରେମଟା
ବେଦନାଟା ଖାଏ ଛାତି କୋରଖି....I
ଆଜି ବି କେମିତି ଚିତା ପାଉଁଶ ମୋ
ତୁମ ପାଇଁ ପଡିଛି ରହି
ନ ପୋଡ଼ି ପଡ଼ିଛି ଛାତି କଲିଜାଟା
ଏବେ ବି ତୁମ ବାଟ ଚାହିଁ....I
ହୃଦୟକୁ ତୁମ ନାଁ ରେ କଲି ମୁଁ
ଶବ ବ୍ୟବଚ୍ଛେଦ ଘରେ
ଚିରି ଦେଖିନେବ ପାପୁଲିରେ ଥୋଇ
କେବେ ମରିଗଲା ପରେ.... I
ପରଖି ଦେଖିବ କଟା ଖଣ୍ଡଟାକୁ
ତା' ଭିତରେ କେତେ ପ୍ରେମ
ଗୋଲାପଟେ ଥୋଇ ବିଦାୟ କହିବ
ଅଧରୁ ଚଳୁଏ ତୁମ.... I
ଦୀପଟିଏ ଜାଳି ଓଢ଼ଣାକୁ ତୋଳି
କରିବ ଶେଷ ପ୍ରଣାମ
ଲେଉଟି ନୀରବେ ଢ଼ାଳିବନି ଲୁହ
ତୁମକୁ ରହିଲା ରାଣ.... I