ବୃଦ୍ଧ ବାପା ମା'ର ଅନ୍ତର କଥା

   ସପନ ଆମର ପାଉଁଶ ହେଲାଣି

    ମନକଥା ଯାହା ମନରେ

   ତୁମରି ଦେହରେ ଡ଼େଣା ଲାଗିବାଠୁଁ

    ହେଇଛୁ ଆମେ ତ ହୀନରେ l

   ଆମ ମେରୁଦଣ୍ଡ ବଙ୍କା ହୋଇଲାଣି

    ଭିଡ଼ ନାହିଁ ଆଉ ଅଣ୍ଟାରେ  

   ଆଖି ଦୁଇ ମିଞ୍ଜି ମିଞ୍ଜି କରିଲାଣି 

     ଦିଶୁ ନାହିଁ କିଛି ଦିନରେ l 

   କାନ୍ଦରେ ଆସ୍ଥାନ କାନ୍ଦରେ ପ୍ରସ୍ଥାନ 

    ଆହା ପଦେ ଟିକେ କୁହରେ  

   ପଶୁଠାରୁ ହୀନ ପଥରର ପ୍ରାଣ 

    ଜୀଇଁଥାଉ ଦିଅ ମାରିରେ l 

   ଭବିଷ୍ୟତ ତୁମ ଗଢ଼ି ଦେଇଥିଲୁ 

    ଏଇ ଆମ ଶୁଖିଲା ଥନରେ 

   ସରି ଆସିଲାଣି କାଳ ବେଳ ଆମ 

     ଦୁହିଁଙ୍କୁ ଟିକିଏ ଅନରେ l 

   କେଉଁ ପୁଣ୍ଯ ତୁମେ ଅରଜି ଆଣୁଛ 

    ମନ୍ଦିରକୁ ଦେଇ ଦାନରେ  

   ଜାଣି ଗଲୁଣି ଆମେ ତୁମ ଅନ୍ତରେ 

    ତିଳେ ହେଲେ ନାହିଁ ଥାନରେ l 

    ସୁକର୍ମ ବଳରେ ବଳିୟାନ ହୁଅ 

    କୁକର୍ମେ ହୋଇବ ଲୀନରେ  

   ଆସ ହେ ଈଶ୍ୱର ନେଇଯାଅ ଆମକୁ 

    ମିଶାଇ ଦିଅ ଏ ଶୂନ୍ୟରେ l