ମିଳନ୍ତା ଏମିତି ସାଥୀ

ମିଳନ୍ତା ଏମିତି ସାଥିଟିଏ ଯଦି

ଜୀବନେ ଭରନ୍ତା ସଫଳତା  

ଶବଦ ମୋର ସେ ବୁଝୁ କି' ନ ବୁଝୁ

ବୁଝିପାରନ୍ତା ମୋ ନୀରବତା I 

ମାପି ପାରନ୍ତା ଏକାକି ଜୀବନର 

ଏହି ନିଃସଙ୍ଗର ଗଭୀରତା  

କାନ୍ଦିବା ବେଳେ ଶିଖାଇ ଦିଅନ୍ତା ସେ

ମୋର ହସିବାର ମାଦକତା I 

ବରଫ ଭଳି କଠିନ କେବେ ପୁଣି 

ହୁଅନ୍ତା ସେ ନମନୀୟ ଲତା  

ଲହୁଲୁହ ପୋଛି ମୋର ବେଦନା 

ସବୁ ତ ନିଃଶେଷ କରୁଥାନ୍ତା I 

ସୁଖେ ଦୁଃଖେ ମୋର ପ୍ରତିଛବି ପରି 

ମୋ ସାଙ୍ଗେ ବାଟ ଚାଲନ୍ତା  

କର୍ମେ କବଳିତ ହୃଦୟଟି ତାର

ମୋ ପାଇଁ ଗୀତ ଗାଆନ୍ତା I 

ଦମନ କରନ୍ତା ମୋର ଅମଡ଼ା ବାଟର

ସବୁ ଦୁର୍ଦ୍ଦଷତା କଳୁଷତା  

ନୀଡଖୋଜା ପକ୍ଷୀ ଭଳି ମ୍ଳାନ ସନ୍ଧ୍ୟାର

ସାଗ୍ରହେ ସାନନ୍ଦେ ଖୋଜୁଥାନ୍ତା I 

ଆହ୍ଲାଦିତ ଏଇ ତରଙ୍ଗିତ ମନେ

ସ୍ୱର୍ଗୀୟ ପ୍ରେମଟି ବସା ବାନ୍ଧନ୍ତା  

ଏପରି ସାଥିଟେ ଖୋଜିବୁଲେ ମୁଁ

ମୁକ୍ତ ହୃଦୟେ ମୋତେ ଭଲପାଆନ୍ତା  I