ଆଖି ଥାଇ ଅନ୍ଧ
ଆଖି ଥାଇ ଅନ୍ଧ
ଦେଖ ଭାଇ ଦେଖ ଦୋଷୀ ଯାଏ ଖସି
ଆଖି ଦେଖା ସାକ୍ଷୀ ଏଠି ମୁକ
ଅକାରଣେ ତ ନିର୍ଦ୍ଦୋଷ ପାଏ ଫାଶୀ
ମିଛ ସାକ୍ଷୀ ଦେବା ପାଇଁ ଲୋକ l
ସ୍ୱାଭିମାନ ଆଜି ଦାଣ୍ଡରେ ଗଡ଼ୁଛି
ହାଟରେ ହେଉଛି କିଣା ବିକା
ପାଞ୍ଚ ଟଙ୍କାର ଖବର କାଗଜର
ପ୍ରଥମ ପୃଷ୍ଠାରେ ପରା ଲେଖାl l
ବଢ଼ିଛି ହତ୍ୟା ଲୁଟ୍ ଆଉ ଧର୍ଷଣ
ଲୁଣ୍ଠିତ ଏଠି ମଣିଷର ଅଧିକାର
ରକ୍ତମାଂସ ଧାରୀ ଏକ ନବ ଜୀବନ
ଦଳି ହେବାବେଳେ ସମ୍ପୂର୍ଣ୍ଣ ତୟାର l
ପଞ୍ଚସ୍ତରୀ ବର୍ଷ ପରେ ବି ଭାରତ
ସୁରକ୍ଷା ପାରୁନି ଦେଇ
ଦିନ ଦ୍ୱିପହରେ ଆଜିର ମହିଳା
ସୁରକ୍ଷିତ ମଣୁ ନାହିଁ l
ନାରୀ ହୋଇଛି ଆଜି ଉଚ୍ଚଶିକ୍ଷିତା
ନର ସାଥେ ହୋଇ ସମ
ଶିକ୍ଷିତା ହେଲେ ହେଁ ନିଇତି ଧର୍ଷିତା
ଧର୍ଷି ନର ରୂପି ଶ୍ଵାନ l
ନିଶା ବଟିକାକୁ କରନ୍ତି ସେବନ
ଦେଶ ଭବିଷ୍ୟତ ଗଣ
ନିଶା ଖାଇ କରେ କେତେ ପାପ କର୍ମ
ନାରୀକୁ କରି ହରଣ l
ଅଧିକାର ସିନା ଆମ ସମ୍ବିଧାନ
ପାରିଛି ସାଇତି ରଖି
ସେହି ଅଧିକାର ସତରେ କାହିଁକି ?
ପାରୁନି ବି କେହି ଦେଖି l
ସବୁଜାଣି ବି ଆଇନ୍ ଅନ୍ଧ ଏଠି
ଦେହ ଲୋଭୀ ପୁରୁଷ ଆଗରେ
ବଦଳି ନାହିଁ ଲୋକଙ୍କ ଦୃଷ୍ଟିଭଙ୍ଗୀ
ଯୁଝିଲେଣି ମରଣ ସାଥିରେ l
ଅହିଂସା ସ୍ଵାଧିନତାର ମାନେ ଆଜି
ଗୋଟେ ନାରୀ ପାଇଁ କିଛି ନାହିଁ
ଜଘନ୍ୟ ଅପରାଧକୁ ଦେବାକୁ ଦଣ୍ଡ
ଅଦାଲତ ପାଶେ ଶକ୍ତି ନାହିଁ l
ସମାନତା କଥା କହୁଛନ୍ତି ସିନା
ସମାନ ନୁହଁନ୍ତି କେହି
ଅସମତା ମଧ୍ୟେ ବଞ୍ଚୁଛି ମଣିଷ
ଭୋକ ଉପାସରେ ରହି l
ବିଦେଶୀ ବଣିକ ଚାଲିଗଲେ ସିନା
ଶାସନ ଯାଇଛି ରହି
ଆମ ରାଜନେତା ବରିଷ୍ଠ ଶାସକ
ତାଙ୍କ ଠାରୁ ମୁକ୍ତି ନାହିଁ l
ଜାଗ ହେ ଜନତା ଜାଗ ହେ ମାନବ
ଆଉ କି ବଳିଷ୍ଠ ପ୍ରମାଣ ଦରକାର ?
ଅନ୍ଧ ଏଠି ଆଇନ୍ ଆଖି ଥାଇ ଅନ୍ଧ
ଏଇ ଆମ ଦେଶର ଅଗ୍ରସର l