ମୁଁ ନୁହେଁ ମୁଁ

ତୁମ ସେ ସହର ଲାଗଇ ଜହର 

ରାତେ ବଇଶାଖୀ ମୋତେ 

ମୋ ଗାଁକୁ ଦେଖି ଅସ୍ରlକୁ ଅସ୍ରl

ବର୍ଷା ଢ଼ାଳଇ କେତେ l 

ତୁମ ସହରୁ ଆସେ ଅତର ଗନ୍ଧ 

ସଞ୍ଜ ଢ଼ଳିଲା ପରେ 

ମୋ ଗାଁକୁ ଛୁଏଁ କଦମ୍ବ ମହକ

ଡିବିରିର ଆଲୁଅରେ l 

କଂକ୍ରିଟ ଘରେ ବିଦେଶୀ ଝଙ୍କାର 

ଯେବେ ଖେଳୁଥାଏ ତୁମ 

ଭାଗବତ ଟୁଙ୍ଗୀ ଖଞ୍ଜଣୀରେ ଥାଏ 

ଗାଁ ସର ସର ଆମ l 

ରୂପ ସହରର ରଙ୍ଗିନ୍ ପକ୍ଷୀ ଗୋ 

ରଙ୍ଗ ଡ଼େଣାକୁ ଝାଡି 

ଦେଖିନିଅ ଥରୁଟେ ଗାଁକୁ ଆସି ମୋ 

ଗାଉଁଲି ଛାତିଟା ପଢ଼ି l 

କଥା ଦେଇଥିଲ ମଥାକୁ ଛୁଇଁ ମୋ 

କିପରି ରହିଛ ଭୁଲି ? 

ବୟସ ଜାଳୁଛି ହୃଦୟ ପଠାରେ 

ଆଖି ଦୁଇ ଖେଳେ ହୋଲି l 

ତୁମ ଅପେକ୍ଷାରେ ରାତି ସରିଗଲା 

ଜହ୍ନ ବି ଗଲା ବୁଡି 

ସାଇତା ଗଜରା ବାସି ହୋଇଗଲା 

ଅତର ବି ଗଲା ଉଡ଼ି l 

ଫୁଟି ଝରୁଥିଲେ ଅଗଣା ଶେଫାଳି 

ଦୀପ ଆସୁଥିଲା ଲିଭି 

ରହିଗଲି ଯାହା ସ୍ମୃତି ଚାରଣରେ 

ତୁମ ପାଇଁ ଭାବି ଭାବି l 

ମୁଁ ଯେଉଁଦିନ ମୁଁ ରହିବିନି

ଭାବି ଭାବି କଥା ତୁମ

ପବନେ ଲାଗିବ ପୂବେଇ ଛୁଆଁଟା

ଋତୁ ଥିବ ବଦନାମ