ଭାସିଯାଆ ମୋର କାଗଜ ଡଙ୍ଗା
ଭାସିଯାଆ ମୋର କାଗଜ ଡଙ୍ଗା
ପବନ ବହୁଛି ଝିପିଝିପି
ମେଘ ବରଷଇ
ବିଜୁଳି ଚମକେ ଘଡ଼ଘଡ଼ି
ଡାକେ ରହି ରହି l
କେତେ ମଜା ଲାଗେ ଗଗନରୁ
ବରଷା ପଡ଼େ ଝରି
ଫୁଟି ଭାସିଯାଏ ପାଣିରେ
ଫୋଟକା ଅସୁମାରୀ l
ଡରିଯିବୁ ନାହିଁ ଗଗନର
ଦେଖି ମେଘ ବାଆ
ଅଟକିବୁ ନାହିଁ କଥା ମୋର
ଶୁଣି ଭାସିଯାଆ l
ଝୁଲି ଝୁଲି ତୁହି ବହୁଦୂରେ
ବେଗେ ଯାଆ ଭାସି
ବିଦାୟ ଦେଉଛି ତୋତେ ମୁହିଁ
ଏବେ ହସି ହସି l
ଏଇ ହାତେ ତୋତେ ଗଢିଛି ମୁଁ
ଆଜି ଭରଷାରେ
ଖେଳିଛି ତୋ ସାଥେ ଏହିପରି
ଭିଜି ବରଷାରେ l
ଭାସିଯାଆ ମୋର କାଗଜ
ଡଙ୍ଗା ଭାସି ଯାଅl
ବାଟଯାକ ଯେତେ ନୂଆ ନୂଆ
ସାଥି ଭେଟୁଥାଆ l