କେମିତି ସମୟ ଆସିଲା କେଜାଣି ??

କେମିତିକା ସମୟ ଆସିଲା କେଜାଣି

ହଠାତ୍ ଦିନେ ବିଦ୍ୟାଳୟ ବନ୍ଦ ହେଇଗଲା,

ପରୀକ୍ଷା ନ ସରୁଣୁ ଛୁଟିଟା ଆରମ୍ଭ ହେଇଗଲା,

ପାଠପଢାଟା ଅଧାରୁ ବନ୍ଦ ହେଇଗଲା,

ଶ୍ରେଣୀ ଗୃହ ସହିତ ବିଦ୍ୟାଳୟ ଫାଟକରେ ତାଲା ଝୁଲିଗଲା,

ବିଦ୍ୟାଳୟ କେବେ ଖୋଲିବ 

ସେଇଟା ବି ଅଜଣା ହେଇଗଲା।

ଭାବିଲି ବିଦ୍ୟାଳୟର ସବୁ ସ୍ମୃତିକୁ ଗୁନ୍ଥିଦେବି,

ସ୍ମୃତିର ମାଳା କରି ଗଳାରେ ପିନ୍ଧିନେବି,

ନିଇତି ପାଣି ଛିଞ୍ଚି ସତେଜ କରୁଥିବି ସ୍ମୃତିସମୂହକୁ।

ହେଲେ କ'ଣ ହେବ ଯେ !

ସ୍ମୃତିକୁ ଗୁନ୍ଥୁଗୁନ୍ଥୁ ଡୋରଟା ଛିଡିଗଲା,

ସମୟର ଉଜାଣି ସୁଅରେ ସବୁ ସ୍ମୃତି ଭାସିଗଲା,

ତଥାପି ଚେଷ୍ଟା କରୁଚି,

କିଛି ସ୍ମୃତିକୁ ହାତ ଦେଇ ଅଟକାଇବାକୁ,

ସାଙ୍ଗ ପିଲାଙ୍କ ହୃଦୟରୁ ପାଇଥିବା ସେ ଶାଶ୍ୱତ ସ୍ନେହକୁ,

ସମସ୍ତଙ୍କ ସହ ବିତେଇଥିବା ସେ ହସଖୁସିର ମୁହୁର୍ତ୍ତ ଗୁଡାକୁ,

ହେଲେ ପାରୁନି...ମୁଁ ଜମା ପାରୁନି।

ସୁଅ ମୁହଁରେ ପତରର ଅବସ୍ଥା ପରି ହୋଇଛି 

ମୋ ସ୍ମୃତି ସମୂହର ଅବସ୍ଥା,

ଭାସିଯାଉଛି ସେ ଦୂରକୁ,ଦୂରକୁ,ବହୂ ଦୂରକୁ।