ସପନର ଶେଷ ଝଲକ
ସପନର ଶେଷ ଝଲକ
ସପନର ଶେଷ ଝଲକ ନିଦରେ
ଯେବେ ସେ ଝଲସୁଥିଲା
ସପନ ତୂଳୀ ମୋ ବାଟବଣା ହୋଇ
ପ୍ରତିଛବି ଆଙ୍କୁଥିଲା I
ଲାଜଭରା ଆଖି ସତେ ଅବା ! କାହା
ପଥ ଚାହିଁ ରହିଥିଲା
ଚୋରି ଚୋରି ଚୋରା ଚଇତାଳି ସାଥେ
ମୋର ସପନରେ ଆସିଗଲା ।
ଆଜିବି ଦେଖୁଛି ସେହି ପ୍ରତିଛବି
ତୁଠେ ଉଙ୍କି ମାରିବାର
ସଞ୍ଜ ନଇଁଗଲେ ଚହଲା ପାଣିରେ
ଜହ୍ନ ସାଥେ ଖେଳିବାର I
ଅଳସ ପାଦଟା ପାଉଁଜିର ତାଳେ
ଯାଉଥିଲା ନାଚି ନାଚି
ଦୋଳି ଖେଳୁଥିଲା ହୃଦୟ ଗୋପନେ
ମନ ଖେଳୁଥିଲା ପୁଚି I
ଛାତିରେ ପଶିଲା ଛନକା ରୋଗଟା
ଦେହ କସ୍ ମସ୍ ହେଲା
ଶୋଇଲେ ବସିଲେ ସପନ ଘାରିଲା
ନିଦଟା ଉଭେଇ ଦେଲାI
କଳପ ଗଳପ ଅଳପେ କହିଲା
ରାତି ସପନରେ ଆସି
ନିଦ ସରିଗଲା ଜହ୍ନ ବୁଡା ବେଳେ
ପ୍ରଭାତେ ଝୁରୁଛି ବସି I