ଇଛା ହୁଏ

ଇଛା ହୁଏ

ମନପବନ ଘୋଡାରେ ଚଢି

ଯାଆନ୍ତି ଉଡି କେଉଁ ଅଜଣା ରାଇଜକୁ

ସମସ୍ତ ମାୟାଜାଲରୁ ମୁକୁଳାଇ ନିଜକୁ

ମୁକ୍ତିର ଫଲ୍ଗୁଧାରାରେ ନିଜକୁ ମାଖି

ଅସରନ୍ତି ପଥର ଯାତ୍ରୀ ହେବାକୁ।

ବାଧା ବନ୍ଧନର ବେଡିକୁ ଭାଙ୍ଗି

ନୀତି ନିୟମର ଶୃଙ୍ଖଳ ଛିଣ୍ଡାଇ

ଅମାନିଆ ମନ ଆଜି

ମୁକ୍ତ ବିହଙ୍ଗ ସମ

ଅଗ୍ରଗାମୀ ଆଗକୁ ଆଗକୁ

ମାୟାର ଇନ୍ଦ୍ରଜାଲରେ ବନ୍ଦୀ

ଛଟପଟ ଆତ୍ମାଟି

ଚାହେଁ ଆଜି ମୁକ୍ତିର ସ୍ବାଦ।

ଇଛାହୁଏ

ସ୍ବପ୍ନର ଅତଳ ଗର୍ଭରେ 

ନିଜକୁ ହଜାଇ

ପାଇବାକୁ ନୈସର୍ଗିକ ଶାନ୍ତି

ଆକଟ କଟକଣାକୁ କ୍ରୁଶବିଦ୍ଧ କରି

ଚାଲିଯିବାକୁ ଇଛାହୁଏ

ଦୂରକୁ ଏବଂ ଦୂରକୁ

ସ୍ବାଧୀନ ଏକ ନିଷିଦ୍ଧ ଇଲାକାକୁ।