ହେ ପୂଜ୍ଯ ବରିଷ୍ଠ

ମହିୟସୀ ମାତା  ହେ ପୂଜ୍ଯ ପିତର

    ପରିଣତ ବୟଃ ପ୍ରାପ୍ତ 

କୃପା ଦୃଷ୍ଟି ତୁମ୍ଭ  କରୁ ସଦା ଭିକ୍ଷା

    ନତୁବା ଆମ୍ଭେ ଅନାଥ ।

ତୁମ୍ଭ ଶୁଭାଶିଷ  ଆତ୍ମିକ ବିଶ୍ବାସେ 

    ପରିଚୟ ଆମ ସୃଷ୍ଟି

ତୁମ୍ଭ ପାଦପଦ୍ମେ ସ୍ବର୍ଗ ସୁଖ ଶାନ୍ତି

    ତୁମ୍ଭେ ଆମ ଗତି ମୁକ୍ତି ।

କାଳଜୟୀ ତୁମ୍ଭେ  ଅତୁଟ ଅଭିଜ୍ଞ

    ପୁରୁଷ ପୂୂଜ୍ଯ ପ୍ରଜ୍ଞାନ

ତୁମ୍ଭେ ପକ୍ଷୀ କ୍ଲାନ୍ତ ଶ୍ରାନ୍ତ ଅବିଶ୍ରାନ୍ତ

    ଜ୍ୟୋତି ଦିଗନ୍ତ ଅମ୍ଳାନ ।

ଜଳିଅଛ କେତେ ସଳିତା ପ୍ରାୟକ

    ଢାଳିଅଛ ଲହୁ ଲୁହ

ତୁମ୍ଭ ପରିଶ୍ରମ  ବଳେ ବର୍ତ୍ତମାନ

    ଏ ସଂସାର ସୁଖମୟ ।

ସହଜ ସ୍ୱଭାବ ସମାଧାନ ସୂତ୍ର

    ତୁମ୍ଭେ ଜୀବନ ଆଦର୍ଶ

ଲୋଡା ସର୍ବୋପରି ଜ୍ଞାନ ଅଭିଜ୍ଞତା

    ତୁମ୍ଭ ସ୍ନେହ ପରାମର୍ଶ ।

ତୁମ୍ଭେ ବନ୍ଦନୀୟ ତୁମ୍ଭେ ପୂଜନୀୟ

   ବୟୋଜ୍ୟେଷ୍ଠ ଗୁରୁଜନ

ତୁମ ଶୁଭାଶିଷେ  ସମାଜ ଉନ୍ନତି

   ସେବା ତୁମ୍ଭ ପୁଣ୍ୟ ଧର୍ମ ।

ଶୋଭାପାଅ ଶିରେ ଦିବ୍ୟ ଶୁଭ୍ର ତେଜେ

   ବରିଷ୍ଠ ହେ ଗରୀୟାନ

ବରଦ ମୁଦ୍ରାରେ ବରଷୁ ଅମୃତ

   ହେଉ ଆମ୍ଭେ ଭାଗ୍ୟବାନ ।