ଗାଆଁ ହାତ ଠାରି ଡାକେ

ଗାଆଁ ହାତ ଠାରି ଡାକେରେ

ମୋ ଗାଆଁ ହାତ ଠାରି ଡାକେ,

ଆ ଆ ଫେରିଆ' ମୋ କୋଳକୁ ଧନ

ସାଉଁଟି ନେବିରେ ବୁକେ ।

ଗ୍ରୀଷମରେ ଏଠି ପୋଡ଼ୁନାହିଁ ମାଟି,

ତୋଟାରୁ ବୋହୁଛି ଶୀତଳ ବାଆଟି ।

ଆଷାଢ଼ରେ ମେଘ ଟପର ଟପର

ଚାଷୀ ପୁଅ ହଳ ଯୋଖେ ।

ଶ୍ରାବଣ ପୂର୍ଣ୍ଣମୀ ଦିନ ଗୋରୁ ପୂଜା,

ରକ୍ଷା ବନ୍ଧନ ବି ହୁଏ ଭାରି ମଜା ।

ଖୁଦୁରୁକୁଣୀ ଓ ଜହ୍ନିଓଷା ପରା

ଝିଅ ଯେ ପାଳନ୍ତି ସୁଖେ ।

ହେମନ୍ତଟି ହେଲେ ପଡ଼ଇ ଶିଶିର,

ପ୍ରଥମାଅଷ୍ଟମୀ ପରବଟି ସାର

ମାର୍ଗଶିର ମାସର ଯେ ଗୁରୁବାର

ବୋହୂ ଘରେ ଝୋଟି ଆଙ୍କେ ।

ମାଘରେ ପା' ଏଠି ଯେ ବାଘୁଆ ଶୀତ,

ପନିପରିବାଟି ହୁଅଇ ବହୁତ

ଫସଲ ଅମଳ ସରିଯାଇଥାଏ 

ନିଆଁଟି ପୁଅଁନ୍ତି ସୁଖେ ।

ଫଗୁଣ ଆସିଲେ ଗାଅଇ କୋଇଲି,

ଦୋଳ ପର୍ବ ଆଉ ରଙ୍ଗଖେଳ ହୋଲି

ସାରାଟା ଅଞ୍ଚଳ ଯେ ଚଳଚଞ୍ଚଳ

ଆମ୍ବ କଷି କେହୁ ଚାଖେ ।

କର୍ମ ସନ୍ଧାନରେ ଆସିଅଛି ଦୂରେ,

ତଥାପି ତାହାକୁ ଏଠି ମନ ଝୁରେ

ନିଶ୍ଚୟ ମୁଁ ଯିବି ଦେହେ ବୋଳିହେବି

ଆଣି ତା'ର ଧୂଳି ଟିକେ ।