ଏ ଓଡି଼ଆ ପୁଅଟା ଉଠୁଛି କାହିଁ

ଏ ଓଡି଼ଆ ପୁଅଟା ଉଠୁଛି କାହିଁ ?

ଶୋଇଛି ତ ଶୋଇଛି

ନିଘୋଡ଼ ନିଦରେ ଘୁଙ୍ଗୁଡି଼ ମାରି

ନିଦରେ ଖାଲି ସପନ ଦେଖୁଛି ଅସରନ୍ତି

ବେଳେବେଳେ ବିଳିବିଳେଇ କହୁଛି

ମୋ ବାପା ଗୋସେଇଁ ବାପା

କରିଥିଲେ କେତେ କଣ

ମୋର କରିବା କି ଦରକାର

କିଛିର ତ ଜମାରୁ ଅଭାବ ନାହିଁ

ଏ ଓଡି଼ଆ ପୁଅଟା ଉଠୁଛି କାହିଁ ।

ପୋତା କେତେ ଉଭା କେତେ ଅଛି

ଖାଇବି ଶୋଇବି ଅୟେସ୍ କରୁଛି କରିବି

ମୋତେ କହିବାକୁ ତମେ କିଏ

ଉପଦେଶ ଦେବା ପାଇଁ

ଏ ଓଡିଆ ପୁଅଟା ଉଠୁଛି କାହିଁ ।

ଆପଣାର କେହି କଳେ ବଳେ

ଉଠେଇବାକୁ ଯଦି ଡାକୁଛି ତଣ୍ଟି ଫାଳି

କହୁଛି ରୁହନା ବକ୍ ବକ୍ କରନା

ତୁମର କି ଆଉ କିଛି କାମଧନ୍ଦା ନାହିଁ

ମୋ ସାଥୀରେ ଲାଗୁଛ ବେକାରଟାରେ

ମୋ ସୁଖର ନିଦ ଭାଙ୍ଗ ନାହିଁ

ଏ ଓଡି଼ଆ ପୁଅଟା ଉଠୁଛି କାହିଁ ।

ଯଦି କେତେବେଳେ ଓଡି଼ସ କି ମଶା

କାମୁଡି଼ଲା ଏଠି ସେଠି ଛାଇ ନିଦରେ

ପେଟ ପିଠି ଗାଲେ ଥାପୁଡେଇ ହୋଇ

ଉଠୁଛି ତ ବିଛଣାରୁ ଝାଡି଼ଝୁଡି଼

ଏଇଟା ନାଇଁ ସେଇଟା ନାଇଁ କହି କହି

ଘର ପକାଉଛି ଉଠାଉଛି ରଡି କରି

ବେଳ ଦେଉଛି ହୁଏ ହାଇଁପାଇଁ

ଏ ଓଡି଼ଆ ପୁଅଟା ଉଠୁଛି କାହିଁ ।

ବାପା ମାଆର ତ ଗେହ୍ଲା ପୁଅ

ଗେଲରେ ମାଆ ବୁଝେଇ ସୁଝେଇ

ଖାଇବାକୁ ଦିଏ ଯେବେ ନ ଭଜା ଛ ତୁଣ

ବାହାର କରୁଛି କେତେ ଗୁଣ

ଘର ଖାଇବା ଛାଡି଼ ବାହାରେ ଖାଉଛି

ଭଲ ଭଲ ମିଳୁଛି କେଉଁଠି

ଦରାଣ୍ଡି ବୁଲୁଛି ଏଣେ ତେଣେ ଚାହିଁ

ଏ ଓଡିଆ ପୁଅଟା ଉଠୁଛି କାହିଁ ।

ବାପା ମାଆର ବଳ ବୟସ ଗଲେ

ନିଜ ବେକରେ ଯେବେ ମାଦଳ ପଡୁଛି

ବଜେଇବା ଦୂରର କଥା

ବେତାଳ ଶବଦ କରି ମାଦଳ ଫଟାଉଛି

ଲେମ୍ବୁ ଲୁଣ କିଛି ନ ପାଇଲେ

ବାପାମାଆକୁ ଘରେ ତଣ୍ଟିଆ ମାରୁଛି

କୁଳ ପ୍ରଦୀପ ଜଳି କୁଳକୁ ଆଲୁଅ ନଦେଇ

ଘର ଜଳେଇ ଦେଇ ପସ୍ତେଇ ହେଉଛି

ଭୁଲ୍ ହେଲା ଭୁଲ୍ ହେଲା କହି

ପକାଉଛି ରାଣ ନିୟମ ଆଖିକାନ ଛୁଇଁ

ଏ ଓଡି଼ଆ ପୁଅଟା ଉଠୁଛି କାହିଁ ।