ଦୁର୍ଘଟଣା

ଘଟଣା ଘଟିବ ଜାଣିଲେ ଆଗରୁ

ସବୁ ହୁଅଇ ଠିକଣା

କିଛି ନଜଣାଇ ସୁରାକ ନଦେଇ

ଘଟିଥାଏ ଦୁର୍ଘଟଣା।

ଓଲଟପାଲଟ ସବୁ ହୋଇଯାଏ

ଦୁର୍ଘଟଣାଗ୍ରସ୍ତ ହେଲେ

ଯିଏ ବି ତାହାର ହୋଇଛି ଶିକାର

ଏକଥା ସେ ଜାଣେ ଭଲେ ।

ଦୁର୍ଘଟଣା ନାମ ଅଟଇ ତାହାର

ଯେବେ ହୁଏ ଉପଗତ 

ମନେରଖ କିଛି ବୁଝିବା ଆଗରୁ

ଆସିଯାଏ ସେ ହଠାତ ।

ବାତାବରଣକୁ ଅଶାନ୍ତ କରାଏ

କେବେ କରେ ଅଙ୍ଗହାନି 

କେତେବେଳେ କେତେ କ୍ଷୟ କ୍ଷତି କରେ

କରଇ ଜୀବନ ହାନି ।

କେତେ ଦୁର୍ଘଟଣା ଘଟେ ଆଖି ଆଗେ

ଜଳେ ସ୍ଥଳେ ଆକାଶରେ

ସତର୍କତା ଆଉ ସାବଧାନତାରେ

କେହି ଏଥିରୁ ନିସ୍ତରେ ।

ନୀତିନିୟମର ଉଲ୍ଲଙ୍ଘନ ହେଲେ

ଦୁର୍ଘଟଣା ହେବା ସାର

ସଭିଙ୍କ ପ୍ରୟାସ ଲୋଡା ଏଥିପାଇଁ

ହୁଅ ଏବେ ଆଗୁସାର ।

ଦୁର୍ଘଟଣାଗ୍ରସ୍ତ ହେଲା ଯଦି କେହି

ତୁରନ୍ତ ସାହାଯ୍ଯ କର 

ତୁମ ସାହାଯ୍ଯରେ ହୁଏତ ଜୀବନ

ରକ୍ଷା ହୋଇବ କାହାର ।

ଦେବଦୂତ ଭଳି ଆଗେଇ ଆସିଲେ

ପର ଉପକାର ପାଇଁ 

ଏ ଜୀବନ ତୁମ ଧନ୍ୟ ହୋଇଯିବ

ଅନ୍ୟଥା ବୁଝିବ ନାହିଁ ।