ଦରବାର
ଦରବାର
କେତେ ପୁଣ୍ୟ ବଳେ ମଣିଷ ଜନମ
ପାଇଅଛୁ ଧରା ତଳେ.
କରମ ବରଜି ଅକର୍ମ ଅରଜି
(ମୁଁ -କାର ସରଜି )
ଅହଂ ରମନ୍ତି ସକଳେ.1
କ୍ଷମତା ର ବଳେ କଷ୍ଟ ଦେଉଛ
ଜନତାଙ୍କୁ ଇଛା ମତେ
ସଦଭାବନା କେବେ ସମ୍ଭବ ହୋଇବ
ଅସହିଷ୍ଣୁ ହୁଅ ଏତେ.2
ଦେଶ ର ବୈଭବ ଲୁଣ୍ଠନ କରୁଚ
ସାଧୁ ବୋଲାଇ ଭବେ.
ପଦ ପଦବୀର ଅପମାନ କେତେ
ଜାଣନ୍ତି ଜନତା ସର୍ବେ.3
ତୁମ ବାହୁ ବଳେ ଭୟରେ ନୀରବେ.
ଦିନ ଗଣୁଛନ୍ତି ଆଜି
ସ୍ୱାଧୀନ ଚେତା ଯେ ଖୋଲୁଥିଲା ମୁହଁ
ଫସାଅ ଲଗାଇ ବାଜି.4
ତୋସାମଦିଆଙ୍କ ଭିଡ଼ରେ ରହିଣ
ଚିହ୍ନି ତ ପାରୁନ ସତ୍ୟ.
ତୋସାମଦିଆର କୁକୁର ପ୍ରକୃତି
ସ୍ୱାର୍ଥ ଲାଗି ହୁଏ ଭୃତ୍ୟ.5
ସଯତ୍ନେ ରଚାଇ ସୁରକ୍ଷା ବଳୟ
ମଣୁ ଅଛ ନିରାପଦ
ଦେଶ ର ରକ୍ଷକ ଡିଣ୍ଡିମ ବଜାଇ
ସଭିଙ୍କୁ ଶୁଙ୍ଘାଅ ଗଦ.6
ଅଢେଇ ଦିନର କୁଣିଆ ହୋଇତୁ
ଧରା କୁ ମଣୁଛୁ ସରା.
ପ୍ରାରବ୍ଧ ସରିଲେ ଫେରିବୁ ନିଶ୍ଚିତ
ଜୀବ ବୁଦବୁଦ ପରା.7
ତୁମ ଦରବାରେ ଭଲ ର ମନ୍ଦର
ଅଜବ ବିଚାର ଚାଲେ.
ସ୍ୱାର୍ଥ ପାଇଁ କି ପାପଟାକୁ ତୁମେ
ପୁଣ୍ୟ ବିଚାର ଭଲେ.8
ତୋ ପାପ ପୁଣ୍ୟ ର ହିସାବ ହୋଇବ
ଭାଟ ତ ନଥିବେ ଭାଇ .
ପାପ ଟାକୁ ଏଠି ପୁଣ୍ୟ ଲାଗିଥିଲା
ସେଠି ଶୁଣିବେନି କେହି::::9