ମାତୃଭାଷା

ଇଂରାଜୀ ଭାଷାଟି କି ମନ୍ତ୍ର କରିଛି 

କୁହ ହେ ମଣିଷ ବାରେ

ମାତୃଭାଷା ତୋର କେତେ ଆପଣାର

ଚିନ୍ତି କି ପାରୁନୁ ଥରେ ।

ମାତୃଭାଷା ତତେ ପରିଚୟ ଦେଲା

ପ୍ରକାଶି ତୋହରି ଗୁଣ,

ରାଜ୍ଯ ମିଳିଥିଲା ବିଦେଶୀ ହାତରୁ

 ହେଜ ଭାଷା ଅବଦାନ।

ମାତୃଭାଷା ବଳେ ରାଇଜ ହୋଇଲା

ଦେବଭୂମି ପରିଚିତା,

ଭାଷା ମହାନତା ସକଳେ ଜାଣିଲେ

ପାଏ ଶାସ୍ତ୍ରୀୟ ମାନ୍ଯତା ।

ଭାଷା ହିଁ ଜୀବନ ନିର୍ବେଦେ ସ୍ପନ୍ଦନ 

ବିକାଶେ ଅଟେ କାରଣ,

ଭାଷାର ଉତ୍କର୍ଷେ ସାଧୁସଙ୍ଗ ଭାଷେ

ସଂସାର କରେ ବନ୍ଦନ ।

ମାଆର ଭାଷା ଯେ ଅମୃତ ସମାନ

ଜୀବନ ସମୃଦ୍ଧ ହୁଏ,

ଭାଷା ସହଯୋଗେ ଭାବର ଆବେଗେ

ବଶିଭୂତ ସବୁ ହୁଏ।

ବଡ ହୀନିମାନ ଦୁର୍ଲ୍ଲଭ ଜୀବନ

ଯା" ଭାଷା ଅଟେ ଦୁର୍ବଳ ,

ନିଜ ଭାଷାଛାଡି ଅନ୍ଯ ଭାଷା ଭିଡି

କୃତଘ୍ନ ପରା ସକଳ।

ମାଆ ହତାଦର ଅନ୍ଯକୁ ଆଦର

କିପରି କରୁଛୁ ତୁହି,

ଏପରି ହୋଇଲେ ବିଲୟ ନିଶ୍ଚିତ 

କେବେ ନ ସହିବ ମହୀ।

ତୋ ପୂର୍ବ ପୁରୁଷ ମାତୃଭାଷା ଧରି

ଜଗତେ ହେଲେ ବିଦିତ,

ତାଙ୍କରି ଔରଷୁ ଜନମ ହୋଇଣ

ଭାଷା କରୁ ଅପଖ୍ଯାତ ।

ଅନ୍ଯଭାଷା ସହ କରିଲେ ତୁଳନା

ଜାଣିବ ଆମର ସ୍ଥାନ,

ନିଜ ଭାଷାନେଇ କେତେ ବିକଶିତ

ଆମେ କେଡେ ଦୀନହୀନ।

ଆମ ଭାଷା ପ୍ରତି ବିଦେଶୀ କେବେ ତ

ବଳାଏ ନାହିଁ ସେ ମନ,

ଜାପାନ ଜର୍ମାନ ଇଜ୍ରାଇଲ ରୁଷ

ସ୍ବଭାଷେ ବିଶ୍ବେ ମହାନ।

ନିଜଭାଷା ପ୍ରତି ରଖେ ହୀନଭାବ

ଦେଶଦ୍ରୋହୀ ଅଟେ ସେହି,

ଅନ୍ଯଭାଷା ପ୍ରୀତି ଜାତିର ବିପତ୍ତି

ମନେ ରଖିଥାଅ ଭାଇ ।

ପଢିବା ଇଂରାଜୀ ମନା ଜମା ନାହିଁ

ସଂସ୍କାର ନଭୁଲି ଆମେ,

ଭାଷାର ଉନ୍ନତି ସଂସ୍କୃତି ସଂହତି

ଧ୍ଯାନ ଦେବା ପ୍ରତିଯାମେ।

ମାତୃଭାଷା ଯେବେ ଉନ୍ନତି ହୋଇବ

ପ୍ରଗତି ଦେଶର ଜାଣ,

ସହଜ ସୁନ୍ଦର ମାତୃଭାଷା ଆମ

ରଖିବା ତାହାରି ମାନ ।

ଓଡିଆ କହିବା ଓଡିଆ ଲେଖିବା

ବଢିବ ମାନ ଭାଷାର,

ଶୁଭପଥେ ଯେବେ ଗମନ କରିଲେ

ମିଳେ କୃପା ବିଭୁଙ୍କର।