ଦାଉ ସାଧୁଅଛି ଏବେ

ହେଇଲୋ, ଯାଉଛି ନାଟୁଆ ନାଗର

ହାତରେ ବଇଁଶୀ ଧରି ,

କଣେଇ କଣେଇ ଅନେଇ ହସୁଛି

କିଛି ନ ଜାଣିଲା ପରି ।

ଏଇକ୍ଷଣି ଯାଇ ଯମୁନା କୂଳରେ

ଛକି ବସିବ ଲୋ ଇଏ ,

ହଟହଟା ତାକୁ କରିବ ନିଶ୍ଚୟ

ନୀର ଆଣି ଯିଵ ଯିଏ ।

ଯେତେ ଯାହା ତାକୁ ଝିଙ୍ଗାସି କହିଲେ

ଶୁଣେ ନ ଶୁଣିଲା ପରି ,

ଗାଲୁଆ ପଣରେ ସାରା ଗୋପପୁରେ

କିଏ ହେବ ତା'ର ସରି !

ବଡ଼ଘର ପିଲା ନାଆଁ ପଡ଼େ ସିନା

ଆମ ଘରୁ କରେ ଚୋରି ,

ଆଟିକାରୁ ଦୁଧ ପିଉ ପିଉ ଦିନେ

ନେଇଥିଲି ହାତ ଧରି ।

ବିକଳ ହୋଇକି ମୋତେ ଅଳିକଲା

ଘରେ କହିବନି ଜମା ,

ମାଆ ଜାଣିଗଲେ ଛାଟରେ ପିଟିବ

ନ ମାନିବ କାହା ମନା ।

ଭଳିଗଲି ତା'ର ସରଳ କଥାରେ 

କହିଲିନି ରାଣୀ ଆଗେ ,

ସେଥିଲାଗି କିବା ମୁହଁ ବଢ଼ିଗଲା

ଦାଉ ସାଧୁଅଛି ଏବେ ।