ବ୍ୟଙ୍ଗ କବିତା

#ସିଧାକଥା-21

ଅଳପ ଦରଜ ବଥର ପାଖକୁ ଚିପିଲେ ବଢିଆ ଲାଗେ,

କାଛୁ କୁଣ୍ଡିଆକୁ ନଖରେ ରାମ୍ପିଲେ ମନରେ ଆନନ୍ଦ ଜାଗେ । 

ଶୁଖୁଆ ଟିକିଏ ଲୁଣି ହେଇଥିଲେ ସୁଆଦ ଅଲଗା ତା'ର,

ଗାଲୁଆ ବାଡ଼ିରେ ବାରବାଟୀ ଚାଷ ପାଣିରେ ପକାଏ ସର ।

ରାମବାଣଠାରୁ ହନୁର ଖିଂକାର ରାବଣକୁ ବାଧେ ବେଶି,

ପଡ଼ି ଯିବାଠାରୁ ବଳିଯାଏ କଷ୍ଟ ସାଙ୍ଗଟିଏ ଦେଲେ ହସି ।

କଥାରେ ଟିକିଏ ନଥା ମିଶିଥିଲେ ଶୁଣିବାକୁ ଲାଗେ ମଜା,

ଅଭିନେତା ପରି ଭଲ ଅଭିନୟ କରି ପାରିବେନି ରଜା ।

ବୁଢ଼ାବର ଦିଏ ଅଧିକ ଆଦର କଷି କନିଆଁଟି ପାଏ,

ଶୀତଦିନେ ବାସି ପଖାଳ ବଢିଆ ଯଦି ସେ ଖରାରେ ଖାଏ ।

କାନ୍ଥକୁ ସୁନ୍ଦର ପାନପିକ ଛିଟା, ଚିତା-ଝୋଟିଠାରୁ ବଳି,

ଗାଆଁକୁ ସୁନ୍ଦର ଦୁଇଟା ମାଇପେ ଲାଗିଥିବେ ଯଦି କଳି ।