"ରାଗ୍ ସଂସାର"
"ରାଗ୍ ସଂସାର"
ଦୁଇ କୋଡ଼ି ଆଠ ହେଲାଣି ବୟସ
ହାତ କୁ ଦିହାତ ବର୍ଷ ଅଠର
ବେସୁରା ରାଗର ମରଦ ପଣକୁ
ଘରଣୀ ମୋ କରେ ଟାହି ଟାପର ।
ଗୁରୁ ମହାଗୁରୁ କରିଲି ଅନେକ
ଛନ୍ଦ,ତାଳ,ଲୟ ଶିଖିଲି ସ୍ଵର
ଅସଲ ବେଳକୁ ବେସୁରା ହେଉଛି
ମତେ ଶୁଣାଏ ସେ ବରାଡି ସ୍ଵର ।
ବଡ଼ ବିଷମ ଏ ସଂସାର ରାଗଟା
ରାଗ ବଇରାଗ ବଡ଼ ସୁନ୍ଦର
ମନ ବୋଧ ଚଉତିଶା ଶୁଣି ଶୁଣି
ଚଉଦ ପୁରୁଷ ମୋର ଉଦ୍ଧାର ।
ଅଭାବର ଛାନ୍ଦ ଶୁଣି ଶୁଣି ମୁଣ୍ଡ
ଉଦଣ୍ଡ ଦଣ୍ଡରେ କମ୍ପଇ ଘର
ଭାବର ସହରେ ବୈଦେହୀ ବିଳାସ
ମନ ଅଗଣାରେ କେନ୍ଦେରା ସ୍ଵର ।
ମେଘ ମହ୍ଲାରରେ ନୟନ ଯୁଗଳ
ଝରି ଶୁଖିଯାଏ ନେତ୍ରର ନୀର
ରାମ ତାଳି ହଳେ କରିଛି ଯୋଗାଡ଼
ଖୋଜୁଅଛି ଭଲ ମଠ ମନ୍ଦିର ।