ବର୍ଷାର ଅପୂର୍ବ ଅନୁଭବ

କଅଁଳି ଉଠଇ ଶୁଷ୍କ ମରୁପ୍ରାନ୍ତ

ମନ ହୁଏ ଛନ୍ନ ଛନ୍ନ 

ବର୍ଷା ଆଗମେ ଲାଗେ ନୂଆ ନୂଆ 

ଭାବୁକ ହୁଏ ତଲ୍ଲୀନ ।

ବତୁରେ ସବୁଜ ସ୍ବପନ କଳ୍ପନା

ପ୍ରେମପ୍ରୀତି ଅନୁରାଗ

ନିସ୍ରବେ ସ୍ବଚ୍ଛନ୍ଦେ କାବ୍ଯ ମନ୍ଦାକିନୀ

ସୁମଧୁର କୁଳୁନାଦ ।

ପୁଲକେ ଜୀବନେ ଉତ୍ସାହ ଆନନ୍ଦ 

ଉନ୍ମେଷେ ଆଶା ଅଙ୍କୁର

ସଞ୍ଚରେ ଦେହରେ ମୃଦୁ ଶିହରଣ

ବିଭୋରେ ପ୍ରାଣ ଚକୋର ।

ଖୋଜଇ ତତ୍ପରେ ବିନ୍ଦୁରେ ସିନ୍ଧୁକୁ

ଉଚ୍ଚାଟେ ନୀଳ ସମ୍ମୋହ

ଶବଦ ଅକ୍ଷରେ ହୁଏ ନିନାଦିତ 

ଜୟ ଜୀବନର ଜୟ ।

ବରଷା ସଂସର୍ଗେ ବାସେ ଭୁରୁ ଭୁରୁ

ହସେ ମାଟି ସବୁଜିମା

ଗୃହ ବଇକୁଣ୍ଠେ ନନ୍ଦନ ସୁଗନ୍ଧ 

ଗୁଞ୍ଜେ ମଧୁର ମୂର୍ଚ୍ଛନା ।

ବରଷା ଦିଅଇ ଢାଳି ଶୁଭାଶିଷ 

ଅମୃତର ଅନୁଭବ

ମହାର୍ଘ ବୈଭବେ ମହିମା ମଣ୍ଡିତ 

ଅପୂର୍ବା ହୁଅ ସମ୍ଭବ ।