ବୋଉଲୋ ବୋଉ

କାହିଁକି ବୋଉଲୋ ପଚାରୁ ତୁହି ,

ପରୀକ୍ଷାରେ ଭଲ ହେଲାକି ନାହିଁ ?

ପାଠରେ ନଥିଲା କେବେ ମୋ ମନ,

ଖେଳ କୌତୁକରେ ବିତିଲା ଦିନ ।

ମନେ ମନେ ବାନ୍ଧିଥିଲି ମୁଁ ଆଶା,

କପିରେ ଥିଲା ମୋ ବଡ ଭରସା।

ହେଲେ ବୋଉ ମୋର କପାଳ ଫଟା,

ଭାବିଥିଲି ଯାହା ହେଲା ଓଲଟା।

ପରୀକ୍ଷକଙ୍କର  କଡା  ନଜର,

ଭାଙ୍ଗିଦେଲା ସବୁ ଆଶା ମୋହର ।

ଖାତାରେ ଲେଖିଲି ଆହେ ମାଷ୍ଟର,

ଆସିଲାନି ମୋତେ ପ୍ରଶ୍ନ ଉତ୍ତର ।

ପରୀକ୍ଷାରେ କଲ କପି ନିଷେଧ,

କି ବୁଦ୍ଧି କରିବ ବିଚରା ଗଧ !

ନାହିଁ ମୋର ବିଦ୍ୟା ମୁଁ ପାଠଚୋର,

ଦୟାକରି ଦେବ ମୋତେ ନମ୍ବର ।

କରନାଲୋ ବୋଉ ମନ ତୁ ଖଟା,

ଧରାଧରି ପାଇଁ ବାପାଙ୍କୁ ପଠା।

ରହିଛନ୍ତି କେତେ ଗଧ ମୋ ପରି,

ବାପାଙ୍କ ଟଙ୍କାରେ ଯାଆନ୍ତି ତରି।

ବୋଉ କହେ କର୍ମ କଲୁ ଯେମିତି ,

ପାଇବୁରେ ଧନ ଫଳ ସେମିତି ।

ମିଳୁ ତୋତେ ଥରେ ଉଚିତ ଶିକ୍ଷା,

ଆର ସନ ଭଲ ହେବ ପରୀକ୍ଷା ।