ବାଡି ଅଗଣା

ଚାକିରୀ କାଳ ମୋ ବିତିଗଲା ଭାଇ 

ପ୍ରବାସରେ ଭଡାଘରେ

ହୋଇ ବୃଦ୍ଧବୃଦ୍ଧା ଛାଡି ଚାଲିଗଲେ

ପିତାମାତା ସ୍ବର୍ଗପୁରେ ।

ଭାଙ୍ଗିଗଲା ଖଞ୍ଜା ଛପର ପୁରୁଖା

ଝାଟିମାଟି ଚାଳଘର

ନେଇଗଲା କିଏ ଆସବାବପତ୍ର

ତାହା ମୋତେ ଅଗୋଚର ।

ପାଇଲିନି ଖୋଜି ମାଆ ପୂଜୁଥିବା

ଗୁରୁବାର ଶେରମାଣ

ଠାକୁର ସହିତ ଖଟୁଲି ଉଭାନ

ହେଲି କେତେ ମ୍ରିୟମାଣ ।

ଆଜିକାଲି ଭାଇ ସବୁତ ଭଗାରୀ

ନୁହଁନ୍ତି କେହି କାହାରି

ବାଡେଇଲେ କୋଠା ଭାଙ୍ଗି ସବୁ ଚାଳି

ଜାଗାକୁ ମୋ ଗଲେ ଗିଳି ।

ମିଳୁଛି ସୁବିଧା ଚାଉଳ ମାଗଣା

ଭତ୍ତା କାଳିଆ ବଳିଆ

ହତଭାଗା ମୁହିଁ ଏକଲା ବିଚରା

ମହାପାପୀ ଚାକିରିଆ ।

ଚାହିଁ ରହିଥିବି ମଟମଟ କରି

ପାରିବିନି ଘର ତୋଳି

ଚଳିବାକୁ ତାଙ୍କେ ହେବ ଅସୁବିଧା

କରିବେ ଅଯଥା କଳି ।

ରହିଛି ତାଙ୍କର ଦଳର ଶାସନ

ସବୁଆଡେ ପରିଚିତି

ପାଞ୍ଚମୁଖେ ଛେଳି ଅବଶ୍ଯ କୁକୁର

ଠାରିଦେଲେ ନେବେ ଟେକି ।

କଚ୍ଛପ ଗତିରେ ଚାଲୁଛି ଯେଭଳି

ଏଠି ନ୍ଯାୟ ପ୍ରଶାସନ 

ଦଉଡି ଦପ୍ତର ଛିଣ୍ଡୁଛି ଚପଲ

ପାଉଛି ପୀଡା ଭୀଷଣ ।

କରି ଅର୍ଥଶ୍ରାଦ୍ଧ ତୁଚ୍ଛା ଧାଇଁଲେବି

ଘୁଞ୍ଚୁଥାଏ ଦୂର ପଦ୍ମ

ସବୁ ନିଆଁଗିଳା ଝୁଣି ଚାଲୁଛନ୍ତି

ଅଭିମନ୍ଯୁ ହୁଏ ବଧ ।

ନାଚୁଅଛି ସ୍ମୃତି ଆଖିରେ ମୋ ନିତି

ହସଖୁସି ପିଲାଦିନ 

ଝାଟିମାଟି ଘର ଏ ବାଡି ଅଗଣା

ଥିଲା ମୋ ଜୀବନ ସ୍ବପ୍ନ ।

ଲିପୁଥିଲା ମାଆ ଅଗଣା ଦୁଆର

ପକାଇ ଗୋବର ପାଣି

କାଟୁଥିଲା ଝୋଟି ଚିତା ଗୁରୁବାର

ପୂଜୁଥିଲା ମାଆ ଲକ୍ଷ୍ମୀ ।

ଭେଣ୍ଡି ବାଇଗଣ ଖଡା ଶାକେ ବାଡି

ବାରମାସୀ ଅନ୍ନପୂର୍ଣ୍ଣା

ବାରମାସେ ତେର କରି ଓଷାବ୍ରତ

ବାଣ୍ଟେ ମାଆ ପିଠାପଣା ।

ଆମ ଘର ଖଣ୍ଡା ବର୍ଚ୍ଛା ତରବାରୀ

ଧରେନି କେବେ କଳଙ୍କୀ

ଆସିଲେ ପାର୍ବଣ ବସୁଥିଲା ସାଜ

ଦେବୀଙ୍କ କଳସ ସ୍ଥାପି ।

ହୋଇଲି କିପରି ଆଜି ମୁଁ ନିଃସ୍ବ

ଅସହାୟ ସର୍ବହରା

ପାରୁନାହିଁ ବୁଝି ସମୟ ସମାଜ

ହେଲା କିମ୍ପା ସର୍ବଗିଳା ।

ପାଉନାହିଁ ଖୋଜି ମୁଁ ମୋର ଠିକଣା

ଅଗଣା ମୋ ଆବର୍ଜନା

ଛାଡୁଛି ଦୁଃଖରେ ଦୀର୍ଘ ଅଣଚାଶ

କିଂକର୍ତ୍ତବ୍ଯ ମୁଁ ଢମଣା ।