Library
Profile
ଆସନ୍ତାକି ଆଉ ଥରେ
ଆସନ୍ତାକି ଆଉ ଥରେ
ଭୋକ ହେଲେ ମାଆ
ବାଢି ଦେଉଥିଲେ ଭାତ
ବସି ଯାଉଥିଲି
ଧୋଇ ଦେଇ ମୁହଁ, ହାତ
ପାଶେ ବସି ସିଏ
ଦେଉଥିଲେ ମୋତେ ଖୋଇ
ଖାଇ ଦେଇ ତାଙ୍କ
କୋଳେ ପଡୁଥିଲି ଶୋଇ
ଭାବେ ଆଜି ଏତେ ପରେ
ସେଇ ଦିନ ସବୁ
ଆସନ୍ତାକି ଆଉ ଥରେ ।।
ନୂଆ ଜାମା ପାଇଁ
ଯାଉଥିଲି କେତେ ରୁଷି
ବାପା ଆଣୁଥିଲେ
ଦେଖି ହେଉଥିଲି ଖୁସି
ଅକ୍ଷର ଶିଖେଇ
ଦେଉଥିଲେ ହାତ ଧରି
ପଢୁଥିଲି ବସି
ସୁନାପିଲାଟିଏ ପରି
ଭାବେ ଆଜି ଏତେ ପରେ
ସେଇ ଦିନ ସବୁ
ଆସନ୍ତା କି ଆଉ ଥରେ ।।
ଯାଉଥିଲି ଯାତ
ଜେଜେଙ୍କ କାଖରେ ବସି
ତାଙ୍କ ହାତ ଧରି
ବୁଲୁଥିଲି ହସି ହସି
ମୋ ପାଇଁ ଖେଳନା
ଦେଉଥିଲେ ସିଏ ଆଣି
ଖୁସି କରୁଥିଲେ
&nb
sp; ସବୁବେଳେ ମନ ଜାଣି
ଭାବେ ଆଜି ଏତେ ପରେ
ସେଇ ଦିନ ସବୁ
ଆସନ୍ତାକି ଆଉ ଥରେ ।।
ସଂଜରେ ଜେଜେମା'
ଆଣି ଆସୁଥିଲେ ସପ
କୋଳରେ ବସେଇ
କହୁଥିଲେ ନାନା ଗପ
ଶୁଣୁଥିଲି ପୁଣି
ହୁଉଁ ମାରୁଥିଲି ରହି
ଟିକିଏ ଅଟକି
ଦେଉଥିଲେ ସିଏ କହି
ଭାବେ ଆଜି ଏତେ ପରେ
ସେଇ ଦିନ ସବୁ
ଆସନ୍ତା କି ଆଉ ଥରେ ।।
ସାଙ୍ଗ ସାଥି ମେଳେ
ଖେଳୁଥିଲି ଧୂଳି ଖେଳ
ମଜା ଲାଗୁଥିଲା
ଭାଇଭଉଣୀର ମେଳ
କେତେ ହସ ଖୁସି
ହୋଇ ଯାଉଥିଲା ବୁଣି
ରାଗ ରୁଷା ଭୁଲି
ମିଶୁଥିଲୁ ଆମେ ପୁଣି
ଭାବେ ଆଜି ଏତେ ପରେ
ସେଇ ଦିନ ସବୁ
ଆସନ୍ତାକି ଆଉ ଥରେ
ହେଲେ ଆସେ ନାହିଁ
ଭାବନାରେ ଦିନ ସରେ ।।
