ଆସିଗଲା ଭାଇ ପରବ ରଜ

ଆସିଗଲା ଭାଇ ପରବ ରଜ l

     ଧରିତ୍ରୀ ମାତାର ଅପୂର୍ବ ସାଜ ll

ଅପୂର୍ବ ପରବ ଆମ ଉତ୍କଳେ ll

    ପରବ ପାଳନ୍ତି ଆବୃଦ୍ଧ ବାଳେ ll

ଓଡ଼ିଆ ଅମେ ତ ଭାରି ବଢ଼ିଆ l

     ପରବ ପାଳୁଛୁ ଜାତି ଜାତିଆ ll

ବାରମାସେ ଆମ ତେର ପରବ l

     ଜଗନ୍ନାଥ ଆମ ଇଷ୍ଟ ବାନ୍ଧବ ll

ରଜ ଆସିଗଲା ରଜ ଆସିଲା l

     ବରଡାଳେ ରଜଝୁଲି ଲାଗିଲା ll

ଯାଆ ରଜଝୁଲି ଯାଆରେ ଉଡ଼ି l

      ପରି ରାଇଜରୁ ଆଣିବୁ ଚୁଡ଼ି ll

ଝୁଲି ଡାକ ଦେଲା ରଅଟ ରଟ l

   ମୋ ଭାଇ ମୁଣ୍ଡରେ ସୁନା ମୁକୁଟ ll

ସପତା ଘରରେ ତାଆସ ପଡ଼ି l

     ଆମ୍ବ ଗଛ ଛାଇ ରଜ ବାଗୁଡ଼ି ll

ବୋହୁ ଘରୁ ଭାର ଆମ୍ବ ପଣସ l

     ପାନ ଖାଇଯିବ ସଜନୀ ଆସ ll

ପ୍ରବାସରୁ ଆସିଛନ୍ତି ମୋ କାନ୍ତ l

   ଶୁଣ ଶୁଣ ମୋର କେଳୁ ସାଆନ୍ତ ll

ଏମିତି ପରବ ଜଗତେ କାହିଁ l

     ପରବ ମାଟି ମୋ ଉତ୍କଳଭୂଇଁ ll

ରଜ ଶେଷହେଲା ମେଘ ବରଷା l

      ରଜସ୍ଵଳା ଭୂଇଁ ସର ସରସା ll

ଆସ ଲଗାଇବା ପାଦପ ମାମୁଁ l

      ନଡ଼ିଆ ପଣସ ରସାଳ ଜାମୁ ll

ଗଙ୍ଗା ଜଳେ ବସୁମତୀ ସ୍ନାହାନ l

   ତୋ ପଦେ ନମଇଁ ଦୀନ ସନ୍ତାନ ll