ଆକାଶ କଇଁଆ ଚିଲିକା ମାଛ
ଆକାଶ କଇଁଆ ଚିଲିକା ମାଛ
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ବନ୍ୟା ବାତ୍ୟାରେ ହଜିଲା ବିଲ
ଦେଖି ପାରିଲିନି ଘରେ ଜାଉ ଓ ତୋରାଣି
ପେଟ ପାଟଣା ତାଡନାରେ ବିତେ,
ଦିନତକ ଯିବ ସମୁଦ୍ର ଢେଉ ଗଣି ଗଣି ।
ମା ର ରୋଗ ଯନ୍ତ୍ରଣାକୁ ଚିହ୍ନି ପାରିଲାନି
ଅର୍ଥ ଲୋଭୀ ଚିକିତ୍ସକ ଯେତେ,
ମା'ର ଶବ ଉପରେ ଫିଙ୍ଗିଲି ଖଇ,
କଉଡ଼ି ଓ ଖୁଚୁରା ସାଧ୍ୟ ମତେ ।
ଭଗ୍ନୀ ପାଇଁ ଆଖିରେ ଦେଖିଥିଲି ସପନ,
ମୋର ମନ ଥିଲା ସ୍ଵପ୍ନଭରା,
ଯୌତୁକ ନିର୍ଯ୍ୟାତନାରେ ଆଦରିଲା ସେ
ଫାସିଲଗା ଦଉଡିର ସାହାରା ।
କିଛି ମଣିଷ ଈଶ୍ବରଙ୍କ ନାମ ନେଇ
ପ୍ରବଞ୍ଚନା-ପୂଜାପାଠର ନୂଆ ସ୍ୱର,
ହୃଦୟରେ ବୁଣିଲେ ହଳାହଳ ବିଷ
ଯୁଗର ଯେତେ ସବୁ ସୁସଭ୍ୟ ଚତୁର ।
ଅହଂ ଭାବର ଉତ୍ତାପେ ସେମାନେ
ଭିଆଇଲେ କେତେ ଘୃଣ୍ୟ ଦଙ୍ଗାଗୋଳ
ସେପରି ନିର୍ଦ୍ଦୟ ହୃଦୟ ଆଇନ ଆଖିରୁ
ସହଜେ ଯାଆନ୍ତି ମୁକୁଳି ଚିରକାଳ ।
ଶୁଭିଲା କେବଳ ଭାଷଣରେ ସ୍ୱର
ମାନବତାର ମହାମନ୍ତ୍ର ଜୀବନ ଦର୍ଶନ,
ମୁଁ ରାବିଲି ବାସ୍ତବତାକୁ ଆସି,
ବନ୍ଦ କର ! ବନ୍ଦ କର ଏଇ ପ୍ରହସନ ।
ଦୁଷ୍କର୍ମୀଙ୍କୁ ଶାସନ କଳ ଆଇନ
ପୋଲିସ ଯୋଗାଇ ଘଣ୍ଟ ଘୋଡାଅନ୍ତି,
ନିଜକୁ ଦେଶଭକ୍ତ ବୋଲାଇ ସେମାନେ
ଆଜି ଦେଖ କିପରି ଗରଜୁ ଅଛନ୍ତି ।
ପୁଂଜିପତି ସ୍ୱାର୍ଥରେ ସବୁଜ ବନାନୀ
ନଷ୍ଟ କରି ଭାବନ୍ତି ଖେଳିବ ସବୁଜ କ୍ଷେତ
ନୁହେଁ କି ଆକାଶ କଇଁଆ ଚିଲିକା ମାଛ
ଦେଖିବା ବିଶ୍ୱରେ ଭାରତ ମାଆର ନେତ ।