ନିଛାଟିଆ କି !

" ନିଛାଟିଆ ଗଛ" !

ନା ନା ମୁଁ କାଇଁ ନିଛାଟିଆ ହେବି?

ମୋ ପାଖରେ ତ ଅଛନ୍ତି ପକ୍ଷୀ ଆଉ ତାର ଶିଶୁ ଶାବକରୁ କେତେ,

ଅଛନ୍ତି ବି ତ ଗୁଣ୍ଡୁଚି, ବାନର, ତେନ୍ତୁଳିଆ, ତେଲୁଣି

ଆଉ ଶହେ ପ୍ରକାର ସାନ ବଡ ପୋକ

ମୁଁ ନିଶ୍ବାସ ନଉଛି ।

ତେବେ ପୁଣି ଏକା କଣ ଅଛି?

ଦିଗବଳୟ ଭରା ବାଦଲ

ଭେଟି ଯାଉଛନ୍ତି ମତେ ପ୍ରତିଥର

ଭେଟି ଦେଉଛନ୍ତି ବର୍ଷା ର ସହସ୍ର ବୁନ୍ଦ ।

ଆଉ ଏ ପବନ! ସିଏ ତ

ଗପୁଥାଏ ମୋ ସହ

ଅହରହ, ସାଉଁଟି ସାରି ସାରା ରାସ୍ତା ର ଅନୁଭବ ।

ଦେଖ , ଏ ଯେତେକ ପିମ୍ପୁଡି

ମହଲ ଗଢିଛନ୍ତି

ସୁଢଙ୍ଗ ତଳ ରାଜ୍ଯରେ

ମୋରି ଚେର ତଳେ ।

ଦିଟି ଶିଆଳପାତିଆ ଆଉ ଦଳେ ଠେକୁଆ ବି

ଗାତ କରିରହିଛନ୍ତି

ସଭ୍ଯ ପଡେଶୀ ପରି

ଘାସର ଚଦର ପାରି ।

ଶତଯୁଗରୁ ଏଇଠି ଏମିତି ଠିଆ ମୁଁ ।

ଭଲ ନା ,ଯାଗା ଟା ନିଛାଟିଆ

ନହେଲେ ତ କେବେଠୁ

ପଡିଥାନ୍ତି କାହା ଘରେ

କାଠ ପଟାଖଣ୍ଡ ହେଇ ।