ବର୍ଷାରେ

ଝୋ ଝୋ ବର୍ଷା 

ତମାମ ରାତି ବର୍ଷା 

ଖୁବ୍ ବର୍ଷା

ଭିତରେ ଓ ବାହାରେ ବି ବର୍ଷା ।।

ଅଦିନିଆ ତ ନୁହେଁ 

ତା ନିଜ ମାଲିକାନାର ସମୟ ଅବଧିରେ

ପାଦଥାପିଛି ବର୍ଷା 

ତେବେ ତାକୁ ରୋକିବ କିଏ 

ଓ କାହିଁକି ବା !! 

ସିଏ ପରା ଭଲ ପାଇବାରେ ଥାଏ !

ପରସ୍ତ ପରସ୍ତ ମାଟି ପରସ୍ତ ତଳକୁ 

ଭେଦିଯାଉଥାଏ ବର୍ଷା

ଟୋପା ଟୋପା ହେଇ ସବୁ ପତ୍ରରେ ସାଇତା ହେଇଥାଏ ବର୍ଷା 

ବାଈଚଢେଇର ଚାଳକୁ କି 'ଛୁଇଁ ପାରୁଥାଏ ବର୍ଷା !

ତଥାପି ଆଖିରେ ସ୍ବପ୍ନ ନେଇ ଓହ୍ଲାଇଆସେ ଏ ବର୍ଷା 

ମନ ସାଇତି।

ଆଖିରେ ବନ୍ୟା 

କେତେ ଛାତ ତଳେ 

ଉଷୁମ ଓଠର ଧୂଆଁର ଛାଇ ଏ ବର୍ଷା

କେତେ ଛାତ ତଳେ

ତାରଫିନ୍ ବିଛା ନୀଳଢେଉମରା ବର୍ଷା ‌।।

କାହା ପଣତରେ ଲ୍ୟାଭେନଡରର ଅତର ପରି ଏ ବର୍ଷା

କାହା ପଣତର ଚିପୁଡା ପାଣିରେ ଭସା ବାଦଲ ଏ ବର୍ଷା।।

ରେ ବର୍ଷା !

ତୁ ତ ନାବିକର ନୁହେଁ 

ନାଆର ବି ନୁହେଁ 

କାଗଜ ଡଙ୍ଗାରେ 

ତୋ ନାମେ କିନ୍ତୁ 

ପ୍ରେମ ଲେଖିଥାଏ 

" ବର୍ଷା "