विषय- वसंत फुलला

सडा प्राजक्ताचा अंगणी पडला

मनोमनी असा वसंत फुलला

जाईजुई चंपा चमेली गंधाळल्या

पळसाचा लाल बहर दारी खुलला

वसंतात पानगळ दिसे रानीवनी

धुंद करी मोहर आम्रवृक्षाचा

फांद्याफांद्यांवर कोवळी पालवी

रव ऐकता कोकिळेच्या कुजनाचा

टांगला झोका वडाच्या फांदी

हिंदोळता सयींसंगे पहा अंगणी

माहेराच्या वाटेवरी झाल्या गोळा

दिन बालपणीचे काढती आठवणी

चैत्र सोहळा गुढीपाडव्याचा

बंधुराजा न्याया येतो सासरी

भेटता मायबापा भाऊ वहिनी

सुख सांडते सखीचं जाताना माहेरी

लेकीबाळा सुनामुली आल्या माहेरी

साऱ्या भेटती प्रेमाने सणावाराला

झिम्मा खेळती दारी अंगणात

तव वसंत मनोमनी गं फुलला

उन्हाळ्याचे दिस आलें करें

लोणची सांडगे पापड शेवया

दारी घातलेले वाळवण सारें

कोठारांत भरुया धान्य कुरडया

आला वसंतऋतू वाजतगाजत

भेगाळली भूई सारें शेतरान

तहानेले पशुपक्षी मुके जीव

कशी भागवावी त्यांची तहान