रुढींचा ढिगारा

चिरडले गेले कित्येक जण

रुढींच्या या ढिगार्‍याखाली,

होरपळल्या हजारो पिढ्या

अज्ञानाची विषबाधा झाली ॥१॥

वैचारिक ठिणगीचा वणवा

स्त्री-पुरुष लिंगभेद घडवी,

अक्कल गहाण भोंदूपाशी

क्रूरता, पाशवी वृत्ती वाढवी ॥२॥ 

सतीप्रथा, हुंडा, केशवपन

कृष्णविवर हे भगिनींसाठी,

पुरुषार्थ कसला गाजवता?

हाती घेऊन दांडूका-काठी ॥३॥ 

देवाच्या नावाने राक्षसघात

मुक्या प्राणिमात्रांचा बळी,

नवस, उपवास, जोगवांती

सुबुद्धीलाही दुर्बुद्धी छळी ॥४॥

अन्यायाला वाचा फोडूनी

पेटवा ह्या अनिष्ट रुढींना,

विज्ञानयुगात जरा वावरा

वाचवा हो पुढच्या पिढ्यांना ॥५॥