ती

अशाच एका क्षणी निवांत बसलेलो असताना

ती धावत येऊन कवेत घेऊ पहाते

मी ही मग वेडा तिला कवटाळू बघतो

तेव्हा ती आल्यासारखीच अचानक निघून जाते

अशाच एका क्षणी कामाशी झुंजत असताना

ती लाडात येऊन माझ्याशी खेळू पहाते

मी ही मग वेडा म्हणतो मरू दे ती लगीनघाई

तेव्हा ती डावच अर्ध्यावर सोडून जाते

अशाच एका क्षणी एकटा बसलेलो असताना

ती आपुलकीने साथ द्यायला म्हणून येते

मी ही मग वेडा झटकून टाकतो एकांताला

तेव्हा ती एकट्या रात्रींत डोळ्यात तेल टाकून जाते

अशाच एका क्षणी मी तिच्या मागावर निघतो

ती ही मग मान ठेऊन पापण्या जड करते

मी ही मग वेडा तिच्या कुशीत विसावायला बघतो

तेव्हा ती 'झोप' मात्र केव्हाच उडून गेलेली असते

तेव्हा ती 'झोप' मात्र केव्हाच उडून गेलेली असते...