सरसर बरस
सरसर बरस
काय सांगू या दुष्काळाची बात
पोट गेलंय हो दीडवीत आत
जगण्या तळमळतेय मानवाची जात
सरसर बरसना पावसा तू बरस .......
कृषकाचे आभाळाकडे डोळे
चातक गळा काढून बोले
आता तरी पडू दे तुझ्या अश्रूंचे गोळे
सरसर बरसना पावसा तू बरस........
कृषीवल झाला कर्जाने नागा
भिजवना तू भूमी च्या भेगा
आता तरी नेसव हिरवळीचा झगा
सरसर बरसना पावसा तू बरस ...........
ओसाड भूमी करपली दिनकराने
सर्व शृंगार लुटला क्रूरतेने
आता तरी भर ओंजळ तुझ्या कराने
सरसर बरसना पावसा तू बरस .......
शेतकऱ्याने लावली पहा आस
त्याच्या गळा दुष्काळाचा फास
आता तरी बरसण्याच्या कामाला लाग
सरसर बरसना पावसा तू बरस ........
दाण्या दाण्याची चणचण
पाण्याच्या थेंबासाठी वणवण
आता तरी पाझर तूस आणना
सरसर बरसना पावसा बरस.....
पशु पक्षांची तगमग पहावेना
तळमळत प्राण त्यागतायना
हतबल मालक अश्रु ढाळतोयना
आता तरी दया तू करना
सरसर बरसना पावसा तू बरस.......
वाट पाहून बियाणेही सुकले
तुझ्याविना उमलायचे विसरले
आता तरी प्राण तू ओत ना
सरसर बरस ना पावसा तू बरस ..........