पावसा...

व्याकुळली रे धरित्री

तरी फाटेना आभाळ;

पावसा, तू धारित्रीशी

का रे, तोडलीस नाळ?

पेरताना पाहुनिया

पळालास दूरदेशी!

तहानलेल्या धरणीची

तृषा भागवू मी कशी?

मेघांची नुसती गर्दी

नाही थेंब, नाही पाणी;

आशा-निराशेचा खेळ

सदा "बळी"च्या जीवनी

नभाकडे टक लागे

थिजले गा डोळे आता;

लपंडाव ऊन-पावसाचा

विव्हळली काळी माता

साथ तुझी हवी राजा

ओल उरी राहू दे रे;

नको दुष्काळाच्या झळा

धन-धान्य पिकू दे रे...