नकोशी

नकोशी

बरे झालं आई मी जन्मास येण्यावेळी,

आपले गावं नव्हतं एवढं प्रगत !

'सोनोग्राफी ' नावाचे मशीन,

नव्हतं सहज कोणापाशी उपलब्ध !!!

'ते' असते तर कदाचित मी असते,

का ग ह्या जगात ?

बरे झालं आई आपल्या गावांत,

नव्हती ही प्रथा!

नको असलेल्या मुलींचे नाव,

'नकोशी ' असे ठेवण्याची !!!

'TV' वरच्या बातम्या पाहून,

आज मनात येतं!

असती अशी प्रथा आपल्या गावात,

तर ठेवलं असते का ग माझं नाव 'नकोशी'?

मला खात्री आहें आई ,

नसतेच तुम्हीं माझे नाव 'नकोशी' असे ठेवले !!!

'मुलगी वाचवा, मुलगी शिकवा',

हा नारा तेंव्हा नसताना हि

आम्हाला तू वाचवलेस, चांगले शिक्षण घेण्यास,

सतत प्रयत्न केलास !!!