निरागस तिचं मन...
निरागस तिचं मन...
मुलगी माझी असावी
सर्वांची लाडकी परी...
वागण्या-बोलण्यात
संस्कारांची शिदोरी... १
नसली जरी परिपूर्ण
गुणसंपन्नतेची खाण...
मनापासून तिने ठेवावा
थोरामोठ्यांचा मान... २
नसावी अबोल बाहुली
विचारातून ती बोलकी...
जपावी तिने निस्वार्थी
भावनांची आपुलकी... ३
नैतिकतेची ती उपासक
चौकस असावी सावली...
विश्वासू कृत्यांतून साकार
दीनदुबळ्यांची माऊली... ४
परोपकारी माणुसकीचं
निरागस तिचं काळीज...
चेहऱ्यावरचं शीतल हास्य
मनामनात अमर राज... ५
नाही कुणास तिचे निंदने
यातच तिचा बहुमान...
कर्तृत्वाशी बांधील शान
माझा वाढे अभिमान... ६