ममतेचा झरा
ममतेचा झरा
सोडा तुम्ही मनातली कटुता
एकमेकांविषयी ठेवा कळवळा
शंका कुशंका राग रोष सोडा
जपू काळजात थोडा जिव्हाळा ||१||
पैका पैका सारा मागेच राहतो
धनाचा हव्यास माणुसकी मारतो
आले किती गेले किती रंक नि राव
चांगला तोच आठवणीत उरतो ||२||
सुधारलो म्हणता म्हणता बिघडलो
निसर्गाचे नियम स्वार्थाने मोडू लागलो
त्याने जरा गती बदलली तरी
आपण क्षणात कोलमडून पडलो ||३||
एक व्हा, नेक व्हा, जगा समाधानी
मानवता जपू, टाळू निसर्गाची हानी
जीव जीवास जाणू, राहू आनंदानी
आयुष्याची रचू नव्याने कहाणी ||४||
नाते शब्दांचे टिकवू जन्मोजन्मी
मैत्रीच्या नात्याचा अभिमान धरा
गुंफलेल्या प्रत्येक नात्याविषयी
वाहू द्या हृदयात ममतेचा झरा ||५||