देह मायेचा झिजला

फाळ नांगराचा शिरे 

काळजात आरपार 

देह मायेचा झिजला 

तेंव्हा पिकलं शिवार ||१||

माती ढेकळाची होई 

रानं मऊसर दिसे 

बैल जुंपू पांभरीला 

मुठ चाड्यावर हसे ||२||

मागे किडे खाण्या येती 

फौज घेऊन बगळे

बाळ झोक्यातून पाहे 

कसे? राबती सगळे ||३||

औत हाकता म्हणतो 

सर्जा राज्याची हो गाणी

संगे शिवार डोलता 

नभ गाळतो रे पाणी ||४||

गेली दमून सांजेला 

पळ काढती घराला 

रानं निजले काळोखी 

दाणे अंकुरे तासाला ||५||

काळ्या मायेची ही कुस 

सुख घालते जन्माला 

नको घाबरू तू धन्या! 

आला बहर तुऱ्याला ||६||