चंद्र देखणा

आज नव्याने हसला

चंद्र देखणा पाहून

फोटो सुंदर किती ते

यान पाठवी तेथून ||१||

ओढ अजुन जुनीच

प्रित ह्रदयी तशीच

दुर असुनही असे

विसरलो नाही कधीच ||२||

बंध जोडतो इसरो

साथ देतसे भारत

तुझी निरोप खुशाली

सांग आम्हाला परत ||३||

भेट अनोखी पाहून

जग हरखून गेले

जन्म कृतार्थ वाटतो

मन भरून रे आले ||४||

मामा जरी तू मुलांचा

भेट नकोस तू टाळू

रक्षा बंधन तुझेही

मनोभावे आम्ही पाळू ||५||

चंद्र लाडका आमुचा

यान धाडले भेटीला

पृथ्वी आली रे अंगणी

सुख भेटीचे दे तिला ||६||