गुढी

मुलगा खुणगाठ वंशवृद्धीची

त्यक्तावी परंपरा मनुस्मृतीची

मुलगी शिदोरी दोन्ही घराची

रोवूनी मेखला स्त्री शिक्षणाची

गुढी उभारु परिवर्तनाची...

सासू आणि सून नात्याची

गुंफण जटिल धाग्यांची

व्हावी वृद्धी आपुलकीची

तोडूनी श्रुंखला परंपरेची

गुढी उभारु परिवर्तनाची...

व्यथा नोकरदार नारींची

लढाई प्रतिदिनी जिकरीची

अपेक्षा तव आदराची

देवूनी भेट प्रशंसेची

गुढी उभारु परिवर्तनाची...

जपणूक रामकृष्ण गाथांची

नांदी आपुल्या संस्कृतीची

नितांत गरज कलियुगाची

गुढी उभारावी परिवर्तनाची

गुढी उभारावी परिवर्तनाची ...