मलाही एकदा पाऊस व्हायचं आहे

मलाही एकदा पाऊस व्हायचं आहे

मातीत मिसळून गंध उधळायचा आहे

एकरुपतेचा धुंद सुगंध साऱ्या

आसमंतात पसरवायचा आहे...

मलाही एकदा पाऊस व्हायचं आहे...//1//

ओथंबलेल्या मेघांमधून धरणीवर

मनसोक्त बरसायच आहे.,...

तिच्या कुशीत लपलेल्या बीजांना

हळूवार,लुकलुकत अ़ंकुरण्यासाठी 

भिजावायचं आहे...

मलाही एकदा पाऊस व्हायचं आहे....//2// 

प्रेमधारांचा वर्षाव करीत

मनामनातील प्रेमाला फुलवायचं आहे

मनातील मोरपीसी आठवांना

अलगद जागवायचं आहे

मलाही एकदा पाऊस व्हायचं आहे....//3//

झाडाच्या पानांवर खेळत

मोती बनायचं आहे

निथळणाऱ्या माझ्याच थेंबांना

बालमनात जपायचं आहे

मलाही एकदा पाऊस व्हायचं आहे...//4//

आकाशात इंद्रधनुष्य बनून

कवी मनात फुलायचं आहे

माझ्या अन् धरतीच्या प्रेमाच्या

रचनांना आकार द्यायचा आहे

मलाही एकदा पाऊस व्हायचं आहे...//5//

डोंगर माथ्यांना चुंबून

धो धो कोसळायचं आहे

खळाळत जाऊन, नदीत मिसळून 

सागरात एकरुप व्हायचं आहे...

मलाही एकदा पाऊस व्हायचं आहे..//6//

सागरातील माझ्या रुपाला 

उन्हात सुकवायचं आहे

वाफ होऊन आकाशात जाऊन

पुन्हा पुन्हा धरणीस माझ्या भेटायचं आहे...

मलाही एकदा पाऊस व्हायचं आहे...//7//...