मीच मला भेटावी

माझी प्रतिमा कळून यावी 

भेट अशी ती घडून यावी

मुकुरासमोर बोलत असता 

भावभावना जुळून यावी 

गुणदोषांचा विचार व्हावा 

मनापासुनी सुधार व्हावा  

गर्व धारणा दूर लोटुनी 

आनंदाचा प्रसार व्हावा 

आयुष्याचे सोने व्हावे 

एक अनामिक जगणे व्हावे

भेट मनाशी मनास होता 

मनासारखे मरणे व्हावे 

ओंजळ भरुनी सुख उधळावे 

दिनदुबळ्यांचे दु:ख कळावे 

निस्वार्थी मी सेवा करुनी  

कामकार्यही लाख फळावे 

 

अनंतगंगा मला मिळावी 

माझ्यामधली कला खुलावी 

राग लोभ तो नकोच कसला 

सद्गुणांनी फळा फुलावी