तिच्यासाठी

तिच्यासाठी काहीतरी करेन म्हणतेय 

माझं दुःख बाजूला मी सारेन म्हणतेय 

होऊ दे ना तिचं थोड दुःख हलकं 

तिच्यासाठी थोडंसं मी जगेन म्हणतेय 

चांदण्यातच तिला कोणी बदनाम केलं 

रात्री बेरात्रीच आता फिरेन म्हणतेय 

ॲसिड हल्ला, तीक्ष्ण वार कुठे शरीर जळतंय 

अन्यायाविरोधी आवाज थोडा उठवीन म्हणतेय 

वासनेच्या नजरा इथे लोचट आहेत 

गर्दीतल्या "त्याची" नजर शोधीन म्हणतेय 

वेदना त्या डोळ्यातल्या वाहत होत्या अपार 

शब्दा शब्दात भरून त्या मी लिहीन म्हणतेय 

चेहऱ्यावरील मुद्रा तिच्या काही सांगत आहेत 

तिलाच पुस्तक समजून मी वाचेन म्हणतेय