माणुसकीतले ऐक्य
माणुसकीतले ऐक्य
निशेच्या गर्भातून किरणांचे अंकुर फुटावे
नैराश्यातून आनंदाचे तुषार उडावे
हातात जे गवसले ते जतन करावे
मिळालेल्या जीवनाचे सोने करावे
दुसऱ्यांच्या वाटेवरचे अडसर स्वतः दूर सारावे
मी कोण? तू कोण? असे प्रश्न न पडावे
घट्ट हात धरून एकमेकांचा, संकटांशी लढण्यास सज्ज व्हावे
सोबतीला प्रेमाची शिदोरी घेऊन मार्गक्रमण करावे
आशेच्या दिव्यातले तेल कधीही संपू न द्यावे
समतेच्या प्रकाशात सकलांना एकत्र आणावे
निराशेच्या भूतकाळातून अलगद बाहेर पडावे
नवे विचार रुजवत वर्तमानात आनंदाने जगत राहावे
दुःखाचे निर्माल्य विसर्जित करावे
आनंदाचे, प्रेमाचे रोपटे मनामनात रुजवावे
जगण्याने छळले म्हणून सरणावर न चढावे
सरणातल्या लाकडालाच जगण्याची मशाल बनवावे
रंग , जात , धर्म विसरून सर्वांनी एकत्र यावे
माणसाला माणसाशी जोडणारे माणुसकीचे गाणे गावे
सर्वांच्याच अंगी एकतेचे बळ भिनावे
दोन्ही बाजू सारख्याच असतील असे नाणे घडवावे
माणूस म्हणून जगावे, माणूस म्हणून जगू द्यावे
'आपण' 'आम्ही' ला जपावे 'मी 'ला बाजूला सारावे
तुझ्यासाठी मी, माझ्यासाठी तू हेच चिंतावे
प्रेमाची शाई, आनंदाची लेखणी करून सुंदर क्षणांना टिपून ठेवावे