माझा बाप

अष्टाक्षरी

माझा बाप

शेतकरी माझा बाप

हिरवाई पेरतोया

देवराया कृपेवरी

भूक जगी तारतोया।

सर्जा राजाच्या जोडीला

बाप शेतात कष्टतो

नाही पोटभर घास

पोट जगाचे भरितो।

पीक पाण्यात बुडते

कधी दुष्काळ छळते

दाटे दुःख अंतरात

सुख डोयात सुकते।

घालमेल लेकरांची

पोट खपाटीला जाते

घोट पाण्याचा पाजून

माय सावरून घेते।

ओढी तिफनीनं रेघा

खाली बियाणं पडते

अनवाणी पावलांनी

माय वखार धरिते।

मले दिसते हिर्वय

स्वप्न बापाचे साकार

लेक शिकतो शाळेत

येवो जीवना आकार।