क्षण

मन स्वच्छंदी होऊन वाऱ्यासवे लहरावे 

 धुंद करणारे प्रभातीचे क्षण

 मनाच्या नजरेने कधीतरी टिपावे

वास्तव्यातील कोमळ गंधाळ नाद 

 जगावे निरंतर क्षणाक्षणात  

 अगणित क्षण हृदयाच्या कप्प्यात 

अलगदपणे जपावा मनामनात  

अनेक सुखद क्षण 

दुखानंतरची असते वहिवाट 

 क्षणांना सोबत घेऊन रोज 

उगवते एक आशेची पहाट  

क्षण काही सुखाचे तर काही दुखाचे

सुखाचा क्षण गोड क्षणांनी गुंफलेला 

आठवणीत असलेल्या मधुर स्मृतींनी जपलेला  

क्षण दुःखाचा वास्तव्याने होरपळलेला 

नैराश्याने झपाटलेला मायेने दुरावलेला  

क्षण कधी हसऱ्या शब्दांचा तर 

कधी बोचऱ्या भावनांचा  

कधी प्रेमाचा तर कधी तिरस्काराचा 

कधी जिंकण्याचा तर कधी हारण्याचा

हाच तर आहे मार्ग जीवनाच्या प्रवासाचा  

प्रत्येक क्षण असतो महत्वाचा 

जर केला सकारात्मक विचार  

आपण आपल्या आयुष्याचा 

 नकारात्मक विचार जर असतील आपल्या मनामध्ये कुठल्याही क्षणी चुकू शकतो निर्णय महत्त्वाचा  

क्षण असतातच काही 

आनंदाचे काही निराशेचे 

काही आठवणीतले काही विस्मरणातले 

काही खचलेल्या मनाला प्रेरणा देणारे 

अस्तित्वाची जाणीव करून देणारे  

भविष्याचे रंगीत स्वप्न दाखवणारे 

रंगीबेरंगी क्षण हे जगण्यास कारण बनलेले  

काही क्षण नातातल्या निर्मळ 

बंधातून फुललेल्या हृदयस्पर्शी मर्मबंधाचे 

क्षणभर विसाव्यातही स्पंदन दिलेल्या अल्लड स्वप्नांचे

 क्षण असतातच असे काही 

आठवावे वाटत नाही 

काही तर विसरल्या ही जात नाही  

आस प्रत्येकाला, लाभावे क्षण सुखाचे 

त्यागुणी स्वार्थ,अंतरी सुख शोधावे  

करुनी परोपकार  

अश्रू पुसावेत दुर्बलांचे  

क्षणभर सुखाच्या क्षणांसाठी उंच शिखरावर चढता चढता लागला एखादा दुःखाचा डोंगर 

तरी एकदा जगून पहावे मनासारखे  

कारण जगणे अनुभवणे म्हणजे जीवन 

कालांतराने जाणवलेले भाव हेच खरे क्षण म्हणावेत  

क्षणांचा खेळ सारा क्षणाक्षणाला बदलतो, 

काही क्षणात सुरू तर काही क्षणात थांबतो

 

जगावा प्रत्येक क्षण बेभान बेधुंद लाटांसारखा 

गगन भरारी घेणाऱ्या पक्षांसारखा 

संपूर्ण सृष्टीला पांघरून घालणाऱ्या अवकाशासारखा  

आयुष्य क्षणभंगुर...

येणारा दिवस नवीन असतो 

त्याच नावीन्य जपावं 

 श्वास थांबला की आयुष्य थांबत उद्याची चिंता सोडून आजचा क्षण जगायला शिकावं 

 मनाची आतुरता कधी सांगून बघावी मनाला 

कधीतरी मनमुराद भेटून घ्याव क्षणाला  

भरोसा नसतोच कोणत्या क्षणाचा म्हणून जगायला हवा तो प्रत्येक क्षण जो आला आपल्या वाट्याला  

भाग्यवंत होऊन, लावावा सार्थकी प्रत्येक क्षण मिळालेला

 वेळेचा धावत्या कालचक्रात क्षण  

जातात अलगद विरघळून 

आठवणींची पान चाळतांना मग आपण पाहत राहतो सारखं मागे वळुन  

कधी चेहऱ्यावरच स्मित हास्य कधी डोळ्यात अश्रुंच्या धारा जेव्हा जेव्हा उघगडला जातो त्या सुंदर अनमोल क्षणांचा जुन्या आठवणींचा पसारा 

त्यातूनी निराशेचे क्षण काढून टाकावे 

धुंद स्मृतीत हर्षित समजून उमजून साऱ्या क्षणांना फुलापरी जपावे  

अर्थांना न्याय देऊ शकतील असे शब्द फार कमी असतात भावनांना व्यक्त करतील असे क्षणही दुर्मिळ असतात म्हणून

क्षण काही हवेहवेसे, 

हृदयाच्या कप्प्यात अलगद जपावे

माणिक-मोती क्षणांचे सुरक्षित त्यात साठवूनी ठेवावे  

 क्षणभंगुर आयुष्य हे क्षणाक्षणांच्या लाटांवर 

मनसोक्त झुलत जावे