कळी
कळी
कळी कोवळी रंगीत
कशी डौलात बहरे
मंद झुळुकीसरशी
हळुवार ती उभारे
दवबिंदू शिंपणाने
थरारुनी शहारली
रश्मीकिरणांनी तिज
हळुवार ऊब दिली
ठिबकत्या सिंचनाने
झाली प्रमुदित कळी
लाज लाजता हळूच
उमलवी ती पाकळी
मुक्त पिसाट वा-याने
खुलविली डुलविली
रंग गंध भुललेले
भृंग पिंगा भवताली
यौवनाचा भार सुखे
वारा खुशीत डुलवी
जाता रवी मावळून
लीले भ्रमर गुंगवी
मिटे अलगद पुष्प
मार्ग बंद परतीचा
बंदीवान भ्रमराला
नसे मार्ग सुटकेचा