काळरात्र..
काळरात्र..
आठवे ती काळरात्र आई
जेव्हा जन्मले तुझ्या पोटी;
"मुलगी झाली" ऐकताच
सर्वांच्या कपाळी आठी.
त्या अबोल मुक्या क्षणी
थांबली माझी जीवननौका;
अजाण होते तरी जाणते तुला
मुलगा हवा होता, नाही का?
कापडात गुंडाळले रडता रडता
काही शब्द पडले कानी;
कुठे नेलं ठाऊक नाही
गात होती फक्त रातराणी.
आई, उघड्यावर फेकले मला
चुकला नाही काळजाचा ठोका?
दुनिया पाहण्यापूर्वीच मला
नियतीने दिला धोका.
भुकेने व्याकुळ झाले मी
ओरडून -रडून थकले- दमले;
कचरापेटीतील घाणीत
श्वास माझे गुदमरले.
आई, मुलगा होत नसेल
तर असं खचायचं नसतं;
निरागस स्त्रीभ्रूण-अर्भक
मारून फेकायचं नसतं.
'आई-बाबा' म्हणून हाक
मारण्याची इच्छा आहे खूप;
मोठी होऊन मीसुद्धा
बदलेल या जगाचे रूप.
अनाथांची माऊली जगतवंद्य
सिंधुताईंचा घ्यावा आदर्श;
लेक वाचवून आणि शिकवून
करू या मानवतेला स्पर्श.