गरीब वेदना आनंदी

जरी असलो आम्ही गरीब

तरीही आहोत आम्ही आनंदी

झोपायला धरती नि उशाला धोंडा

झोप लागते आम्हाला एकदम शांतीची------

 गरिबीच्या वेदना आम्हालाच माहित

पण आम्ही नाही त्याचा बाऊ करीत

आला दिवस पुढे ढकलतो

उद्याच्या भाकरीच्या आशेवर निवांत झोपतो-----

येणारा उद्या कसा असेल माहित नसते

पण तरीही मनाला चिंता नसते

तीन दगडांच्या चुलीवर

भाकरी आमची शेकतच असते-----

इतरांना पाहून कधीकधी मन दुखावते

स्वतःच्या परिस्थितीवर उदासीनता येते

पण क्षणभरच---

त्यांनतर सारं विसरायला होते-----

आमची ही दुनिया आम्हाला आहे प्यारी

शिळी भाकरी खाताना वाटतं लई भारी

ना उद्याची चिंता ना काळजी

पोरांना जवळ घेऊन निजते माऊली-----

कधीकधी चंद्रमौळी झोपडीही नसते नशिबात

दोन वेळचा भाकर तुकडाही नसतो ताटात

तरीही नुसते पाणी पिऊन ढेकर देतो आनंदात

उपाशी पोटी स्वप्न पडतात छान-----

खरं सांगूका तुम्हाला

आमच्या दुनियेत आम्हीच आमचे राजे

परिस्थितीची ना खेद ना खंत

तेव्हा आम्ही च असतो तुमच्या पेक्षा श्रीमंत-------