गंध अनुबंधाचा
गंध अनुबंधाचा
शैशवं आणि वार्धक्य
दोन्ही नांदतयं माझ्या घरी...
धूप,अमृतांजनचा मिश्र गंध
भरून राहिलाय उरी !
स्पर्शाचा गंध छोटू अन
आबांना भासतो आगळावेगळा...
त्यांच्या आविर्भावात दिसतो
प्रेमगंध अन जिव्हाळा !
स्मितहास्य मुखी विलसते
जणू चांदण्यांची बरसात...
चैतन्याचा गंध फुलतो
दोघांच्याही बोळक्यात !
छोटूचे भरघोस जावळ,
तर आबांचे डोक्यावरचे बेट...
दोघांच्याही न्हाऊ माखू
नंतर तेलाचा गंध शिरतो नाकात थेट !
इवल्याश्या दुपट्यात काढते
छोटूची गंधित फुलांनी दृष्ट...
सुगंधी पावडर लावली तरी
चिडचिडत आबा होतात उगाचंच रुष्ट !
ऊनं ऊनं खिचडीवर
लोणकढं साजूक तूप...
सुवासिक गंधाने जीभ चाळवून
दोघांनाही येतो हुरूप !
बोबड्या बोलांनी,
लाळ भरल्या मुखानी लाडिक हट्ट छोटूचा...
जिद्दीने उपभोगतायत
आबा संधिकालातील गंध उन्हाचा !
छोटूच्या हास्यविलोभाने
गंधाळतो खुशीचा बहर...
कधी तृप्ती अन क्षणात
विरक्ती दाखवतात आबा अष्टोप्रहर !
निरागस प्रेम, गंधमय स्मित
असे छोटूचे बालपण..
वार्धक्याच्या दुलईने उबदार होते
तान्हुकल्याचे कोवळेपण !
अतर्क्य,अशक्य ला नाही थारा,
गंधित मोहोर उन्मादाचा...
शैशव,वार्धक्य चालती सोबतीने ,
त्रास न वाटे अनुबंधाचा !
त्रास न वाटे अनुबंधाचा !