Library
Profile
रंगुनी रंगात
रंगुनी रंगात
आयुष्याच्या रंगपटावर उधळले मी रंग...
कधी आनंद तर कधी ऊर्जेत होते मी दंग !
छोटीशी बालमूठ
छोटंसं बालविश्व...
सप्तरंगात न्हालं माझं
नाजूकसं भावविश्व !
तारुण्यातलं पदार्पण म्हणजे रंगांची उधळण...
जोडीदारासमवेत गवसली प्रेमाची पखरण !
संसारात डुंबले प्रेमरुपी केशराच्या धुंद सुवासाने ...
वेदनेचे काळे ढग ही उजळले रुपेरी किनारीने !
लाल गेरू ने सारवला आयुष्याचा सारीपाट...
मनावरची काजळी झटकून सोपी केली बिकटवाट !
लाल लाल गेरूवर घातले रांगोळीचे ठिपके...
नाही जमले आधी पण नंतर झाले पक्के !
प्रयत्न होता विविध रंग सुबकतेने भरण्याचा...
मिसळले एकमेकात तरी सोडला नाही ध्यास चिकाटीचा !
इंद्रधनुषी रंग भरले वेगवेगळ्या जीवनटप्पी...
सप्तरंगात न्हाऊन केली आयुष्याची कोडी सोप्पी !
भरले विविध रंग लाल,पिवळा,हिरवा,
नारंगी अन निळा...
पांढरा मिसळून त्यात उठाव आणला आगळावेगळा !!
लाल रंग उल्हासाचा अन जोशाचा..
पिवळा रंग पवित्रतेचा अन समृद्धीचा !
हिरवा रंग सृजनाचा अन सकारात्मकतेचा..
निळा रंग शांती आणि स्थिरतेचा !
पांढरा रंग मिळूनमिसळून राहण्याचा..
नारंगी रंग हा आनंद अन ऊर्जेचा !
काव्यरूपी रंग भरून केला ध्यास नाविन्यतेचा..
वाचन अन लिखाणाने रंगवला दृष्टिकोण सकारात्मकतेचा !
संस्काररूपी रांगोळीने जीवन रंगीबेरंगी जाहले..
उत्तम,उदात्त,जिगरु वृत्तीने आयुष्य खंबीर झाले !
फुलांच्या पाकळ्यांच्या विविधतेने उजळली रांगोळी...
नैराश्य, उद्विग्नतेची केली कायमची होळी ..
केली कायमची होळी !!
