वृद्धावस्थेतील प्रेमसंबंध
वृद्धावस्थेतील प्रेमसंबंध
आज मी पासष्टीची अन् आमचे हे सत्तरीचे...
फुलवतो भावविश्व अनुभवून दिवस गोडीगुलाबीचे !
सकाळचा चहा यांच्या हातचा,डोळे मिचकावत देतात..
साखर घालायला विसरलो म्हणत माझ्या शुगरची काळजी घेतात !
मिळतोय आयता,मीही पिते आवडीने...
खुश करते त्यांना, करूनि चविष्ट जेवण त्यांच्या मर्जीने !
दुपारच्या वेळी मांडतो सोबत्यांबरोबर पत्त्यांचा डाव...
लहानांसारखे भांडतो, नसतेच जिंकायची हाव !
जातो फिरायला हात धरून एकमेकांचा, लाजत नाही क्षणभर .....
लाडिक हट्टाने पुन्हा अनुभवतो तरुणपण मणभर !
दमल्यावर कुरकुरत नाही,बसतो बाकावर फतकल मांडून....
गजरेवाल्याकडून गजरा घेत पूर्वीची स्मृती येते उफाळून !
भेळवाला दिसताच तोंडाला सुटते पाणी...
यांच्या वटारलेल्या डोळ्यांकडे पाहून बिचारा निघून जातो केविलवाणी !
यांना नाही कसलीच आवड,पण मी ऐकते की काय ...
गुपचूप आईस्क्रीम खाल्ले तरी खोकल्याला फुटतात हजार पाय !
माझी नसते खैर,आरडाओरडीने हैराण होतात कान...
इतका जीव काळजी करतो बघून सुखावतो माझाही प्राण !
शारीरिक व्याधी, वादविवाद यांचे करत नाही उच्चारण...
जीवनाच्या सांजवेळी मिळवतो आनंदी मधुर क्षण !